Naviny haspadarki ad 10 červienia
Padzieńnie ekspartu ŭ lohkaj pramysłovaści
Ekspart pradukcyi biełaruskaj lohkaj pramysłovaści ŭ Eŭropu źviedzieny da minimumu. Pra heta paviedamiŭ staršynia kancernu «Biellehpram» Eduard Naryškin. U 2004 h. 30% pradukcyi pastaŭlałasia ŭ Rasieju, 30% — u EZ, 40% — na ŭnutrany rynak. U vyniku skasavańnia z 1 studzienia kvot na pastaŭki pradukcyi kitajskaj lohkaj pramysłovaści ŭ EZ ceny na hetyja tavary ŭpali na 23—96%, a abjomy ekspartu z Kitaju ŭzraśli na sotni pracentaŭ. Taksama E.Naryškin paviedamiŭ, što da kanca hodu niamieckaja kampanija «Tryjumf» spynić supracoŭnictva ź «Miłavicaj». Svaje zamovy jana pieranosić u Vijetnam, dzie tańniejšaja pracoŭnaja siła. Hadzina pracy biełaruskaj kraŭčychi kaštuje kala dvuch dalaraŭ, kitajskaj — u čatyry razy mienš.
Tym časam ekspart «Biellehpramu» ŭ Rasieju, što byŭ źniziŭsia praz novy mechanizm PDV, viarnuŭsia da raniejšaha abjomu.
EZ pazbavić Biełaruś preferencyj
Eŭrakamisija raspačała praceduru pazbaŭleńnia Biełarusi handlovych preferencyj. Pryčyna — parušeńni pravoŭ prafsajuzaŭ u našaj krainie. Kali pracedura zavieršycca stanoŭča, to preferencyi buduć adnoŭleny nie raniej čym praz šeść miesiacaŭ, i toje tolki ŭ tym vypadku, kali sytuacyja palepšycca.
Litva źnižaje padatki
Sojm Litvy ŭ aŭtorak pryniaŭ pakiet zakonaŭ pra padatkovuju reformu. Pavodle jaho, padachodny padatak z nasielnictva z 1 lipienia źnizicca ŭ siarednim z 33 da 27%, a z 2008 h. — da 24%. Dachody žycharoŭ za hety čas pabolšajuć amal na 1 młrd eŭra. Kab kampensavać straty biudžetu, Sojm dazvoliŭ uradu ŭvieści dva novyja padatki: časovy na prybytak pradpryjemstvaŭ i na nieruchomaść, jakaja zdajecca hramadzianami ŭ arendu ŭ kamercyjnych metach.
Nacbank debiurakratyzujecca
Hałoŭnaja finansavaja ŭstanova spraščaje kamercyjnym bankam papiarovuju pracu. Z 10 červienia buduć admienieny 35 formaŭ spravazdačnaści. Miarkujecca, što ŭ najbližejšaj budučyni abjom biurakratyčnych papier, ź jakimi majuć spravu banki, źmienšycca bolš čym udvaja.
Kaštoŭnaja licenzija
«Biełarusbank» atrymaŭ licenziju na aperacyi z kaštoŭnymi metałami i kamianiami. Takim čynam, bank staŭ čaćviortym, jaki zajmieŭ prava na handal dyjamentami dy zołatam — čym užo zajmajucca «Biełhazprambank», «Biełźniešekanambank» dy «Trastbank».
Pieršyja tarhi
2 červienia adbylisia pieršyja tarhi na Biełaruskaj universalnaj tavarnaj biržy. Handlavali draŭninaj dla ekspartnych pastavak na lipień—vierasień. Udzieł brali 3 firmy-pradaŭcy i 11 pakupnikoŭ. Pradali 137,2 tys. m3 draŭniny na 2,6 młn eŭra. Samymi bujnymi pakupnikami stali ZAT «Ceprus» (Karalaviec) dy «Mondi Packaging Paper Swiecie SA» (Polšča).
Na miažy z alchimijaj
Karparacyja «Amir-S» dy Instytut ciepła- i masaabmienu Akademii navuk stvaryli ŭstanoŭku pa pierapracoŭcy pramysłovych adkidaŭ «Ekatron». Ustanoŭka pierapracoŭvaje adkidy ŭ chimičny sposab na 100% i dazvalaje atrymlivać ź ich paŭnavartasnyja enerhanośbity — haz, identyčny pryrodnamu, mazut, benzin, techničny vuhlarod. Stvaralniki kažuć, što prybytak ad «Ekatronu» budzie roŭny $158 za hadzinu pracy, a dla taho, kab viarnuć hrošy, patračanyja na nabyćcio ŭstanoŭki, spatrebicca nia bolš za paŭhodu.
AFN, AK