Rekordnaja haładoŭka
Najdaŭžejšuju palityčnuju haładoŭku trymaje ŭ Bieraściejskim śledčym izalatary eks-deputat Siarhiej Skrabiec. Siarhiej Skrabiec, lider deputackaje hrupy «Respublika» ŭ pałacie pradstaŭnikoŭ papiaredniaha sklikańnia i aktyŭny apanent ciapierašniaj ułady, byŭ źmieščany ŭ Bieraściejskaje SIZA 15 traŭnia. Jamu inkryminujuć kryminalnaje złačynstva. Sam jon uvažaje svaju spravu palityčnaj. Jon abvieściŭ biesterminovuju haładoŭku, patrabujučy nieadkładnaha vyzvaleńnia. 25-ty dzień jon ničoha nia jeść, pje tolki vadu. U S.Skrabca pačaŭsia hałaŭny bol, biassońnie, boli ŭ nyrkach.
Advakat S.Skrabca Michaił Chomič kaža, što palityk hatovy vyjści z haładoŭki: «Ale jon patrabuje stvaryć adpaviednyja ŭmovy. Kali nia budzie ŭmovaŭ, jon z haładoŭki nia vyjdzie». Chomič padaŭ adpaviednuju zajavu načalniku Bieraściejskaha SIZA. Jon taksama maje źviarnucca z zajavaj pra źmienu miery strymańnia na padpisku ab niavyjeździe abo chatni aryšt: va ŭmovach izalataru vyjści z haładoŭki bieź ciažkich nastupstvaŭ ciažka.
Heta najdaŭžejšaja palityčnaja haładoŭka ŭ historyi krainy. U 1996 h. Jury Chadyka haładaŭ u turmie 23 dni, paśla čaho vyjšaŭ na svabodu ŭ vyniku pratestaŭ suśvietnaj hramadzkaści.
Pačatak leta-2006 adznačyŭsia dramatyčnym paharšeńniem stanovišča z pravami čałavieka ŭ Biełarusi. Kolkaść palitviaźniaŭ raście: da ich liku nieŭzabavie majuć dałučycca asudžanyja Mikoła Statkievič i Pavał Sieviaryniec.
Za arhanizacyju mirnaj akcyi pratestu 25 sakavika 2005 hodu praciahvaje znachodzicca pad vartaj u SIZA deputat Viarchoŭnaha Savietu 13-ha sklikańnia Andrej Klimaŭ.
Sudy, pavodle ćvierdžańnia jurysta niezarehistravanaha pravaabarončaha centru «Viasna» Valancina Stefanoviča, usio čaściej pryznačajuć aryšty j štrafy ŭdzielnikam niesankcyjavanych akcyjaŭ — navat zatrymanym upieršyniu. Raniej im prosta vynosili papiaredžańni.
«Ja ŭžo nie kažu pra spynieńnie spravaŭ praz adsutnaść składu złačynstva, — zaznačyŭ V.Stefanovič u interviju Internet-hazecie «Eŭramost». — Navat u tych vypadkach, kali śviedki-amonaŭcy nia mohuć dać nijakich pakazańniaŭ nakont taho, što zrabiŭ mienavita hety zatrymany. Usie raparty pišucca absalutna adnolkava: udzielničaŭ u niesankcyjavanym šeści, kryčaŭ «Žyvie Biełaruś!» — i ŭsio na hetym».
Apazycyjnyja palityki hatovyja da achviaraŭ u baraćbie za svaje ideały. Mikoła Statkievič zajaviŭ: «Sytuacyja takaja, što nam z Paŭłam Sieviaryncam, mahčyma, jašče buduć zajzdrościć. Ja prahnazuju, što dziejańni režymu z nabližeńniem vybaraŭ buduć jašče bolš cyničnymi». Statkievič zaklikaŭ apazycyjnych palitykaŭ adkinuć usie asabistyja ambicyi — prosta biessensoŭnyja ŭ ciapierašniaj sytuacyi.