Fiskalny šmon
Ministerstva padatkaŭ i zboraŭ nakiravała ŭ rajonnyja padatkovyja inspekcyi cyrkular z pradpisańniem terminovaje pravierki ŭsich niezaležnych vydańniaŭ krainy. Jon patrabuje vyjaŭleńnia «suviaziaŭ ź iłžestrukturami». U ministerskim rasparadžeńni patreba praviadzieńnia kompleksnych pravierak tłumačycca tym, što Mininfarmacyi i pravaachoŭnyja orhany ŭstanavili «fakty parušeńnia zakanadaŭstva» hetymi pradpryjemstvami.
U śpisie — praktyčna ŭsie niedziaržaŭnyja hazety i časopisy, što vychodzić jak pa-biełarusku, tak i pa-rasiejsku. Nia tolki tyja, jakija tradycyjna ličacca «niezaležnymi», ale i kamercyjnyja vydańni nakštałt «Kriminalnoho obozrienija».
Zahad patrabuje pravieryć vydańni «BiełKP-pres» (heta «Kamsamołka»), UP «Nieściarovič», hazety «Zhoda», «Biełorusskuju hazietu» i jašče dziasiatki vydańniaŭ. Navat tyja, što daŭno nie vychodziać, jak «Navinki». U śpisie taksama — infarmacyjnaja kampanija BiełaPAN. Zadačy pravierki — pravilnaść adlustravańnia vyručki i «suviazi ź iłžestrukturami».
Vyklikaje ździŭleńnie, jak heta ananimnyja «pravaachoŭnyja orhany» vyjavili parušeńni va ŭsich niezaležnych vydańniach adnačasova. U Ministerstvie infarmacyi nichto nia zmoh nam rastłumačyć, jakija «fakty parušeńnia zakanadaŭstva» vyjaŭleny adnačasova va ŭsich vydańniach. Jak nam rastłumačyli, ministerstva ŭvohule nie ŭpaŭnavažana kantralavać haspadarčuju dziejnaść vydańniaŭ.
Dakument pradpisvaje vyjavić reklamadaŭcaŭ hazetaŭ i arhanizavać sustrečnyja pravierki ŭ ich. Heta, mahčyma, adlustroŭvaje hałoŭnuju zadaču šmonu — namiaknuć pazastałym reklamadaŭcam niezaležnaj presy na niepažadanaść dalejšaha raźmiašeńnia abviestak. Takija pravierki taksama — sposab psychalahičnaha i finansavaha cisku na vydaŭcoŭ i supracoŭnikaŭ ŚMI. Viedamstva Hanny Dziejki ŭ svaim cyrkulary navat nie parupiłasia raźvieści «pa roznych śpisach» z hazetami Biełaruskuju asacyjacyju žurnalistaŭ (BAŽ), što, jak viadoma, reklamy nie raźmiaščaje pa aznačeńni.
Fiskalnyja pravierki ŭžo startavali ŭ BAŽ, dzie papiaredniaja pravierka prajšła ŭ listapadzie, «Svobodnych novostiach-plus», časopisie «Arche» (papiaredniaja skončyłasia ŭ śniežni), «Dietiektivnoj hazietie». Piśmo ŭkazvaje, što pravierka musić pačynacca ŭ vypadku, kali papiaredniaja adbyłasia mienš čym šeść miesiacaŭ tamu. Heta tłumačyć, čamu pravierki nie pačalisia synchronna ŭ roznych ŚMI. Tak, «NN» pieražyła dźvie kompleksnyja padatkovyja pravierki ŭ śniežni i studzieni.
Nia vyklučana, što ŭ takim režymie — adna tatalnaja pravierka na šeść miesiacaŭ — niedabitaj niezaležnaj presie pryjdziecca isnavać až da prezydenckich vybaraŭ-2006.
U staličnych redakcyjach pašyrana mierkavańnie, što heta pomsta za publikacyi pra fakty biazładździa, karupcyi i parušeńni zakonnaści ŭ krainie.