Naviny haspadarki
«Nardzin» choča zdacca
Medcentar «Nardzin» choča admovicca ad statusu pryvatnaha pradpryjemstva j pieradać dziaržavie častku svajoj ułasnaści. Sproba atrymać novuju licenziju Ministerstva achovy zdaroŭja na medycynskuju dziejnaść akazałasia biespaśpiachovaj. Inšy medycynski centar «Ekamedservis» licenziju atrymaŭ. Jon zarehistravany jak biełaruskaje pradpryjemstva, a nie biełaruska-amerykanskaje SP, jak było raniej.
Novy kandydat na turmu
Zbor akcyjaneraŭ AAT «Biełahraprambank» 27 vieraśnia pryznačyŭ novaha kiraŭnika praŭleńnia Siarhieja Rumasa. Zhodu na jahonaje pryznačeńnie daŭ 22 vieraśnia A.Łukašenka. S.Rumas pryjšoŭ na źmienu Alaksandra Haŭrušava. Toj kiravaŭ bankam dzieviać hadoŭ, ale pazbaviŭsia pasady pa vynikach pravierki dziaržkantrolu.
Bolšaść papiarednich kiraŭnikoŭ banku skončyła turmoju.
Na piva ź «Siabram»
Z 10 kastryčnika pačnie prodaž pradukcyi babrujskaja brovarnaja kampanija «Siabar». Dźvie marki — «Siabar» i «Babroŭ» — buduć vypuskacca ŭ plastykavych butelkach. Kampanija «Siabar» — heta naščadak AAT «Dziednava».
Budziem vazić kitajcaŭ
Prahnoznyja pakaźniki ŭ sfery ŭjaznoha turyzmu Biełarusi dapamoža vykanać Kitaj, skazaŭ žurnalistam namieśnik ministra sportu j turyzmu Česłaŭ Šulha. Dziela hetaha dla kitajskich turaperataraŭ budzie stvorany šerah pramacyjnych turaŭ u Biełaruś. Paśla padpisańnia dahavoru ab supracoŭnictvie ŭ halinie turyzmu pamiž našymi krainami Biełaruś trapić u śpis krain, jakija aficyjny Pekin rekamenduje svaim šmatlikim hramadzianam dla naviedvańnia.
Litva piarojdzie na eŭra
27 vieraśnia ŭrad Litvy ŭchvaliŭ plan pierachodu na eŭra z 1 studzienia 2007 h. Ciapier hety plan pavinny zaćvierdzić litoŭski Nacbank. Kančatkovaje ž rašeńnie prymie kiraŭnictva Eŭraźviazu. Zhodna ź planam, kamercyjnyja banki buduć ažyćciaŭlać abmien najaŭnych litaŭ da 1 sakavika 2007 hodu, a Nacbank Litvy — nieabmiežavany termin. Raniej staršynia Nacbanku Litvy Rejnaldas Šarkinas paabiacaŭ, što kožny darosły žychar krainy napiaredadni ŭviadzieńnia eŭra atrymaje ŭ padarunak pa kalkulatary.
ZD; interfax.by