Adziny nazaŭsiody
Biełaruś — samaja liberalnaja kraina ŭ śviecie. Tolki ŭ nas kryminalniki i terarysty mohuć volna źbiracca pad patranažam dziaržavy ŭ farmacie tak zvanaha Kanhresu demakratyčnych siłaŭ.
Mienavita kryminalnikami i terarystami padajuć apazycyjaneraŭ aficyjnyja ŚMI. I tut na tabie — pravodźcie kanhres na vidnym miescy.
Advarotnym bokam takoj biaźmiežnaj talerantnaści źjaŭlajecca psychalahičny šok zvyčajnych lajalnych hramadianaŭ. Pastaŭcie siabie na miesca siniaka z Anharskaj (infarmacyja dla pravincyjałaŭ: MAZ — adzin z samych ukuranych i abdziaŭbanych rajonaŭ stalicy). Zranku vy vypaŭzajecie na «Aŭtazavodzkuju» pa apachmieł abo šmal i — oba-na: błakitnyja, tarčki i karafany ben Ładena tusujucca kala aŭtazavodzkaha PK. Jakaja moža być vaša reakcyja?
1. «Blin, a ja dumaŭ, piaršak, jakim ja ŭčora zakinuŭsia, — halak», — varočajecie vy mazhami i biažycie da znajomaha vinakura pa dahaniałava. Vynik — zaciažny, jak minimum da leta-2006, alkaholna-traviany zapoj. I kali praz hod biłbord na praspekcie zakliča hałasavać za kvitniejučuju Biełaruś, vas u najlepšym vypadku prabje na «chi-chi».
2. Pad upłyvam apošniaha prahonu Jaŭhiena Novikava pa TV, vy imčyciesia čyścić demakratyčnym radyskam partret. Jak vynik, zarablajecie ad miantoŭ, jakija achoŭvajuć apazycyjnaje mierapryjemstva, dabrotnych kuchtaloŭ. Vynik — apatyja i niedavier da ŭłady.
Takim čynam, daŭšy dazvoł na praviadzieńnie kanhresu, vertykal faktyčna lehalizavała apazycyju. Kali inakš nielha, treba vydumlać aryhinalnyja sposaby marhinalizacyi baćkavych apanentaŭ. Narodnaja mudraść nakont hetaha śćviardžaje: kab pachieryć praces, treba jaho ŭznačalić.
Jak tolki byŭ abvieščany kastynh kandydataŭ na pasadu «adzinaha». Jamu treba było adrazu vyłučać svaju kandydaturu ŭ jakaści pradstaŭnika jakoj-niebudź NDA, naprykład, ad hrupy «Žychary pasiołku Drazdy suprać pavyšeńnia taryfaŭ na kamunałku».
Paśla hetaha vybary «adzinaha» pajšli b jak pa maśle. Prajmeryz u Barysavie. Da miesca hałasavańnia ź Piečaŭ maršyruje kalona sałdat i hałasuje sami viedajecie za kaho. Nie paśpieli «admarozki» aprytomnieć, jak da ich ofisu rulić chieŭra studentaŭ, mabilizavanych słovami dyrektara technikumu: «Čmo, jakoje nia voźmie ŭdziełu ŭ vybarach adzinaha demakrata, raźmiarkuju ŭ Brahin».
Naturalna, u arhanizataraŭ Kanhresu nie było b nijakaha hiemaroju z pamiaškańniem. Kanhres demsił adbyvaŭsia b nie ŭ staličnym Harlemie, a ŭ centry, naprykład, u Pałacy Respubliki. Pa vynikach hałasavańnia Jon lohka staŭ by «adzinym» i adrazu zapatrabavaŭ by ad Dziarždepu ZŠA svajoj zakonnaj doli hrantaŭ, jakaja naležyć jamu zhodna z Aktam ab demakratyi ŭ Biełarusi.
Nu a 18 lipienia, na nastupny paśla prezydenckich vybaraŭ aŭtorak, «Sovietskaja Biełoruśsija» vyjšła b z zahałoŭkam, nabranym samym bujnym kiehlem, — «Na vybarach prezydenta RB pieramoh adziny demakratyčny kandydat!». Pakul Zachad čuchaŭsia b, śviežavybrany harant chucieńka padpisaŭ by dekret ab zabaronie ŭžyvańnia ŭ nazvach słova «Adziny» biez uzhadnieńnia z adpaviednymi strukturami. Kab nie paŭtaryŭsia kazus hetaha hodu.