Makiej i Švarcenbierh abmiarkoŭvali temu palitviaźniaŭ

21.12.2012 / 12:9

Padčas telefonnaj razmovy ministry zamiežnych spraŭ Biełarusi i Čechii Uładzimir Makiej i Kareł Švarcenbierh abmiarkoŭvali temu palitviaźniaŭ, paviedamiła pres-słužba češskaha MZS.

Nahadajem, razmova kiraŭnikoŭ źniešniepalityčnych viedamstvaŭ adbyłasia 17 śniežnia z nahody 20-hodździa ŭstanaŭleńnia dypłamatyčnych adnosinaŭ pamiž Biełaruśsiu i Čechijaj. Pavodle źviestak pres-słužby biełaruskaha MZS, jakija byli raspaŭsiudžanyja praz dva dni paśla hutarki, ministry abmiarkoŭvali tematyku adnosinaŭ Biełarusi ź Jeŭrapiejskim sajuzam i šlachi ich narmalizacyi, a taksama «dasiahnutyja vyniki i pierśpiektyvy dalejšaha raźvićcia biełaruska-češskaha ŭzajemadziejańnia». Zaznačałasia taksama, što razmova adbyłasia pa inicyjatyvie češskaha boku.

Paviedamleńnie pres-słužby MZS Čechii bolš razhornutaje. «Ministry pryjšli da zhody adnosna važnaści ŭzajemnych znosinaŭ i vykazali cikavaść da jaho pašyreńnia nie tolki na dvuchbakovym uzroŭni, ale i na ŭzroŭni Jeŭrasajuza.

Ministr Švarcenbierh znoŭ paŭtaryŭ pra toje, što Čechija zacikaŭlena ŭ supracoŭnictvie ź Biełaruśsiu ŭ miežach Uschodniaha partniorstva. Niezdavalniajučaja situacyja z pravami čałavieka ŭ Biełarusi, u tym liku pytańnie palitźniavolenych, taksama abmiarkoŭvałasia», — skazana ŭ pres-relizie. Pry hetym padkreślivajecca, što, «niahledziačy na roznaść pohladaŭ, abodva baki paćvierdzili zacikaŭlenaść va ŭmacavańni češska-biełaruskich adnosnaŭ i adnosinaŭ pamiž ES i Biełaruśsiu».

Razmova Makieja sa Švarcenbierham supała pa časie ź vizitam u Minsk dyrektara departamienta Rasii, Uschodniaha partniorstva, Centralnaj Azii, rehijanalnaha supracoŭnictva i ABSIE Jeŭrapiejskaj słužby źniešnich dziejańniaŭ Hunara Vihanda.

Pavodle źviestak pres-słužby biełaruskaha MZS, 17 śniežnia jeŭračynoŭnik sustreŭsia z Uładzimiram Makiejem, «baki abmierkavali kompleks pytańniaŭ, što tyčacca niaŭnaha stanu adnosinaŭ pamiž Biełaruśsiu i ES i šlachoŭ ich narmalizacyi». Pradstaŭnictva ES u Minsku paćvierdziła infarmacyju pra vizit Vihanda, ale padrabiaznaści kamientavać nie stała.

Jak miarkujuć analityki, kantakty Brusiela ź Minskam aznačajuć, što baki sprabujuć znajści šlachi vyrašeńnia nienarmalnaj situacyi, jakaja skłałasia ŭ adnosinach Biełarusi i ES paśla prezidenckich vybaraŭ 2010 hoda i nastupnych za hetym padziej. Razam z tym palitołahi nie bačać prykmietaŭ taho, što biełaruski bok hatovy iści na sastupki ES.

Jak viadoma, hałoŭnaj umovaj ES dla narmalizacyi adnosinaŭ z aficyjnym Minskam źjaŭlajecca vyzvaleńnie i reabilitacyja ŭsich palitźniavolenych.

Čytajcie taksama:

Kamientary da artykuła