Saviet Fiederacyi ratyfikavaŭ hazavyja pahadnieńni ź Biełaruśsiu
Saviet Fiederacyi 26 śniežnia ratyfikavaŭ pahadnieńnie ab pastaŭcy hazu ŭ Biełaruś i cenach na jaho, a taksama pahadnieńnie adnosna dziejnaści "Biełtranshaza", paviedamlaje RIA Novosti.
Dakumient ustanaŭlivaje dla Biełarusi na 2012 hod canu na haz, što pastaŭlajecca dla zadavalnieńnia jaje ŭnutranych patreb, a taksama vyznačaje formułu takoj cany na 2013-ty i nastupnyja hady ŭ pryviazcy da cany hazu dla spažyŭcoŭ Jamała-Nienieckaj aŭtanomnaj akruhi.
Pahadnieńniem taksama vyznačajecca paradak raźliku taryfaŭ na pasłuhi pa transparciroŭcy hazu pa hazapravodach AAT "Biełtranshaz" jak dla ŭnutranaha spažyvańnia, tak i za miežy Biełarusi.
Sienatary taksama ratyfikavali mižuradavaje pahadnieńnie ź Biełaruśsiu ab umovach kupli-prodažu akcyj i dalejšaj dziejnaści "Biełtranshaza".Pahadnieńnie praduhledžvaje zaklučeńnie dahavora pamiž AAT "Hazprom" i Dziaržaŭnym kamitetam pa majomaści Biełarusi ab nabyćci rasijskim chołdynham 50-pracentnaha pakieta akcyj "Biełtranshaza" za 2,5 miljarda dołaraŭ. Hetaja ździełka była zakrytaja letaś, i "Hazprom" ciapier vałodaje 100% akcyj biełaruskaha hazatranspartnaha pradpryjemstva.
U pahadnieńni zamacoŭvajucca ŭmovy i kirunki dalejšaj dziejnaści "Biełtranshaza", u pryvatnaści: madernizacyja, rekanstrukcyja i raźvićcio hazatranspartnaj sistemy, jakaja znachodzicca va ŭłasnaści kampanii; ažyćciaŭleńnie "Biełtranshazam" funkcyi vyklučnaha imparciora rasijskaha hazu, što pastaŭlajecca ŭ Biełaruś; transparciroŭka hazu pa terytoryi krainy za jaje miežy i ažyćciaŭleńnie funkcyi apieratara ŭčastka hazapravoda Jamał — Jeŭropa na terytoryi Biełarusi.
Akcyjaniery "Hazproma" na hadavym schodzie ŭ červieni ŭchvalili dahavor kupli "Biełtranshazam" u 2013 hodzie 23 miljardaŭ kubamietraŭ hazu na 4,1 miljarda dołaraŭ. Raniej byŭ uchvaleny dahavor, zhodna ź jakim usiaho ŭ 2012—2014 hadach "Biełtranshaz" moža zakupić u "Hazproma" 69 miljardaŭ kubamietraŭ hazu na 17,25 miljarda dołaraŭ.
Dahavory taksama praduhledžvajuć, što "Biełtranshaz" u 2013 hodzie akazvaje pasłuhi pa tranzicie hazu pa Biełarusi ŭ abjomie nie bolš čym 60 miljardaŭ kubamietraŭ, što na 34,8% vyšej za mierkavany abjom na 2012 hod. Pa mahistralnych trubapravodach, što prachodziać pa terytoryi Biełarusi, ažyćciaŭlajucca tranzitnyja pastaŭki rasijskaha pryrodnaha hazu ŭ Kalininhradskuju vobłaść Rasii, Litvu, va Ukrainu i Polšču.