Miaśnikovič: Da 1 studzienia na kožnym pradpryjemstvie pavinien być płan madernizacyi

Prem'jer-ministr Biełarusi Michaił Miaśnikovič zapatrabavaŭ da kanca hoda zabiaśpiečyć biezumoŭnaje vykanańnie patrabavańniaŭ pa padrychtoŭcy płanaŭ madernizacyi pradpryjemstvaŭ. Ab hetym jon zajaviŭ siońnia na sielektarnaj naradzie.

«Da 1 studzienia na kožnym pradpryjemstvie, uklučajučy biudžetnyja, pavinny być adpaviednyja płany madernizacyi, zaćvierdžanyja i ŭzhodnienyja», — padkreśliŭ Michaił Miaśnikovič.

Pavodle jaho słoŭ, niekatoryja arhanizacyi sprabujuć «zakrycca» biźnies-płanami. «Adnak biźnies-płan, jak praviła, charaktaryzuje abjom vytvorčaści, heta značyć vytvorčuju dziejnaść, — nahadaŭ prem'jer-ministr. — Płan madernizacyi treba razhladać šyrej — heta pytańni padrytoŭki kadraŭ, sacyjalnyja pytańni, mižnarodnaja dziejnaść i hetak dalej».

«Ja patrabuju, kab za astatnija dni ŭsio było zroblena, u tym liku pa kožnaj sielskahaspadarčaj arhanizacyi, — dadaŭ Michaił Miaśnikovič.

Analizujučy vyniki hoda, prem'jer-ministr kanstatavaŭ, što praktyčna ŭsie ministerstvy nie vykonvajuć dadatkova zaćvierdžanyja pastanovaj Savieta Ministraŭ numar 1779 zadańni, asabliva pa źniešnieekanamičnaj dziejnaści. «Što datyčycca vałavoha rehijanalnaha praduktu, pakazčykaŭ ekspartna-impartnych apieracyj u razrevie abłaściej, to ŭ lepšy bok vyłučajucca Viciebskaja i Minskaja vobłaści, horš za ŭsio — Bresckaja vobłaść i horad Minsk», — kanstatavaŭ Michaił Miaśnikovič.

Jon taksama spyniŭsia na prablemnych pytańniach sielskaj haspadarki, u pryvatnaści ŭ śfiery realizacyi małaka. Horš pracujuć u hetym napramku Viciebskaja i Mahiloŭskaja vobłaści, dzie pa stanu na 6 śniežnia pakazčyki pa prodažy małaka vykanany adpaviedna na ŭzroŭni 98,2 pracenta i 99,95 pracenta ŭ paraŭnańni ź minułym hodam. Michaił Miaśnikovič daručyŭ udzialić uvahu vyrašeńniu hetych pytańniaŭ.

Kamientary da artykuła