Illa Bahdanaŭ — jašče adzin padazravany ŭ «špijonskaj» spravie
Navapołacki aktyvist Illa Bahdanaŭ, znajomy aryštavanaha Andreja Hajdukova, raniej byŭ śviedkam pa spravie ab «zdradzie dziaržavie ŭ formie ahienturnaj dziejnaści». 27 śniežnia padčas dopytu ŭ viciebskaj abłasnoj upravie KDB chłopcu było abvieščana, što jaho pieravodziać u status padazravanaha.
«Dopyt byŭ vielmi doŭhi — z 10 da 15 hadzin. Mianie dapytvaŭ śledčy Aleh Barysievič, jaki zajmajecca spravaj Andreja Hajdukova. Jon zajaviŭ, što maje pakazańni i pakazańni Hajdukova razychodziacca, i tamu budzie pravodzicca dadatkovaje rasśledavańnie. I mianie s śviedkaŭ pieravodziać u padazravanyja», — apavioŭ Illa Bahdanaŭ.
Aktyvist ličyć, što mnohija pytańni śledčaha ŭvohule nie tyčylisia Hajdukova, i što jany zadavalisia, kab sabrać niejkuju dadatkovuju infarmacyju. Na častku pytańniaŭ Bahdanaŭ paličyŭ za lepšaje nie adkazvać uvohule.
Chłopiec dadaŭ, što jamu paviedamili pra pieravod Andreja Hajdukova ŭ Minsk. Ale sam jon musić źjaŭlacca na dopyty ŭ Viciebsk. Čarhovy raz jaho vyklikajuć na dopyt 9 studzienia.
***
Illa Bahdanaŭ — siabra arhkamiteta pa stvareńni partyi BCHD. Andreja Hajdukova jon viedaje jaje namieśnika kiraŭnika niezarehistravanaj supołki «Sajuz maładych intelektuałaŭ». Andreja Hajdukova vinavaciać pavodle kryminalnaha artykuła «Zdrada dziaržavie ŭ formie ahienturnaj dziejnaści».
Hajdukova zatrymali ŭ Viciebsku 8 listapada nibyta padčas zakładki tajnika sa źviestkami, jakija mohuć cikavić zamiežnyja śpiecsłužby.
Pavodle Illi Bahdanava, u dačynieńni da jaho śledčy Aleh Barysievič vyrašyŭ nie prymianiać mieru strymańnia — chłopca pakul pakinuli na voli.