Biełarus staŭ čempijonam śvietu pa chakiei siarod moładzi ŭ składzie zbornaj ZŠA
Aleks Halčaniuk vystupaje ŭ zbornaj ZŠA pad №15.
Zbornaja ZŠA zavajavała załatyja miedali čempijanatu śvietu pa chakiei siarod moładzi (uzrost — da 20 hadoŭ), što skončyŭsia siońnia ŭ rasijskaj Ufie.
U finale amierykancy 5 studzienia pieramahli zbornuju Šviecyi 3:1 (0:0, 2:1, 1:0).
Za zbornuju ZŠA vystupaje centrforvard «Manreal Kanadyjens» Aleks Halčaniuk— syn viadomaha biełaruskaha chakieista Alaksandra Halčaniuka. Aleks na hetym čempijanacie zakinuŭ dźvie šajby i zrabiŭ šeść halavych pieradačaŭ.
Aleks naradziŭsia ŭ 1994 h. u Miłuoki. Za jaho zmahalisia i Rasija, i ZŠA. Biełaruskaja fiederacyja, niahledziačy, što chłopiec leta pravodzić u Minsku, ni razu, pa jahonych słovach, nie źviarnułasia da jaho z prośbaj vystupać za ajčynnuju kamandu.
U intervju Priessbołu Aleks u minułym hodzie kazaŭ:
«Mnie nichto nie prapanoŭvaŭ hulać za biełaruskuju zbornuju. Za ŭvieś čas ja nie razmaŭlaŭ ź nivodnym z kiraŭnikoŭ vašaj fiederacyi. Pryznacca, takoje staŭleńnie dzivić. Usie viedajuć, što pravodžu letam u Minsku pa paŭtara-dva miesiacy, ale tym nie mienš nichto nie znajšoŭ čas choć by vyjści na suviaź. Nu što ž, nie treba tak nie treba. Tym ža rasiejcam ja nie adkazaŭ admovaj, prosta daŭ zhodu amierykancam. Ni z kim nie raiŭsia — sam prymaŭ rašeńnie hulać za Biełaruś… oj, za ZŠA, viadoma ž. Usio ž Amieryka — maja radzima».