4,5 miljona rubloŭ štrafu za fota ŭ majcy z vyjavaj Bialackaha
U Hrodnie aštrafavali pravaabaroncaŭ Viktara Sazonava, Ramana Jurhiela i Uładzimira Chilmanoviča.
U Hrodnie 5 studzienia ŭ sudzie Leninskaha rajonu prajšoŭ razhlad administracyjnych spravaŭ, raspačatych suprać haradzienskich pravaabaroncaŭ Viktara Sazonava, Ramana Jurhiela i Uładzimira Chilmanoviča. U suśvietny Dzień pravoŭ čałavieka 10 śniežnia 2012 hoda jany sfatahrafavalisia z partretami źniavolenaha Alesia Bialackaha i knižačkami z tekstam Usieahulnaj dekłaracyi pravoŭ čałavieka.
Paźniej haradzienskaj milicyjaj hety miedyjny fakt byŭ kvalifikavany jak «niesankcyjanavany pikiet» — 18 śniežnia byli składzieny pratakoły apytańnia, a 19 śniežnia aktyvisty byli aznajomleny z pratakołami pra nibyta administracyjnaje pravaparušeńnie. Usie try spravy byli abjadnanyja ŭ adzin administracyjny praces, jaki vioŭ sudździa Vital Lacko. Razhlad doŭžyŭsia kala dvuch z pałovaj hadzin. U sudzie nie było pradstaŭlena anijakich dokazaŭ viny pravaabaroncaŭ, nie znojdziena nijakich śviedak, usio abvinavačańnie hruntavałasia vyklučna na rapartach i domysłach pradstaŭnikoŭ milicyi.
U vyniku sudździa Vital Lacko, nie robiačy pierapynku ŭ pasiedžańni, abvieściŭ svajo pastanovu — pa 15 bazavych vieličyniaŭ štrafu kožnamu. U sumie heta składaje 4,5 miljonaŭ rubloŭ. Pravaabaroncy pierakananyja, što praces mieŭ vyklučna zakazny palityčny charaktar i ličać taki prysud absalutna nieadekvatnym jurydyčnym realijam absurdnaj administracyjnaj spravy.