Maskva abiacaje žorstki adkaz Štatam za «kalekcyju Šniejersona»
Maskva rezka adreahavała na rašeńnie suda ZŠA, jaki abaviazaŭ rasijskija ŭłady vypłačvać bujny štraf za admovu viarnuć amierykanskaj relihijnaj abščynie kalekcyju Šniejersona.
Knihi z kalekcyi Josefa Šniejersona, što naradziŭsia ŭ 1880 h. na terytoryi Mahiloŭskaj hubierni.
U rasijskim MZS zajavili, što aburanyja rašeńniem suda i ličać jaho jurydyčna nikčemnym.Sud Vašynhtona pajšoŭ na biesprecedentny i mahčymy samymi surjoznymi nastupstvami krok -- uviadzieńnie štrafnych sankcyj suprać suvierennaj dziaržavy. My budziem vymušanyja žorstka adkazać u vypadku aryštu rasijskaj dziaržmajomaści, havorycca ŭ paviedamleńni departamienta infarmacyi i druku MZS.
Sud akruhi Kałumbija ŭčora abaviazaŭ urad Rasii vypłačvać pa 50 tysiač dalaraŭ kožny dzień da taho času, pakul kala dziasiatki tysiač redkich dakumientaŭ i knih z kalekcyi rabina Josefa Šniejersona Maskva nie viernie amierykanskim chasidam.
Častku kalekcyi balšaviki nacyjanalizavali paśla revalucyi, inšaja, vyviezienaja Šniejersonam z Savieckaha Sajuza, viarnułasia nazad u Rasiju paśla Druhoj Suśvietnaj vajny. Iudziejski relihijny ruch Chabad Lubavič u ZŠA z kanca 80-ch hadoŭ patrabuje viarnuć im śviatyja dla ich dakumienty. Sud u ZŠA pastanaviŭ pačać praces viartańnia jašče paŭtara hady tamu.
Pakul kalekcyja ŭ biblijatečnym fondzie Rasii.Miž tym advakat ruchu zajaviŭ, što jaho pradstaŭniki buduć usimi zakonnymi sposabami damahacca, kab Rasija vykanała rašeńnie fiederalnaha suda ZŠA ab vypłacie štrafu. Až da aryštu rasijskaj ułasnaści ŭ Štatach, piša hazieta Uoł-stryt Džornał.
Pa niekatorych dadzienych pieršy prezident Rasii Barys Jelcyn u svoj čas abiacaŭ uładam ZŠA viarnuć chasidam śviatyja dla ich dakumienty.