U Hrodnie kamunalniki vyvieźli śnieh na haradski vadapravod i zabłakavali pryvatnyja padvorki
Vyvaz śniehu z vulic horada na śpiecplacoŭki staŭ pryčynaj niepryjemnych siurpryzaŭ.
Pieršy tryvožny zvanok pastupiŭ z vulicy Biełyja Rosy, paviedamlaje «Hrodzienskaja praŭda». Siudy, na pustku ŭzdoŭž čyhunki, stali zvazić śnieh z usioj Dzieviatoŭki. Hetaja kropka samaja blizkaja ad mikrarajona, da jaje i nakiravałasia bolšaść mašyn. U vyniku pad hurbami śniehu apynuŭsia haradskoj vadavod. A kali b zdaryłasia avaryja? Pa hetaj pryčynie placoŭka začyniena, i śnieh siudy vazić zabaroniena.
Jašče bolšy kazus adbyŭsia na placoŭcy dla pryjomu śniehu na pustcy ŭ rajonie vulicy Pučkova. Kiroŭcy samazvałaŭ skidali śnieh nie ŭ adviedzienaje miesca, a tam, dzie zručna. U vyniku była zasypanaja daroha, a try pryvatnyja domaŭładańni apynulisia adrezanymi ad vyjezdu na puciepravod. Pryjšłosia nočču apieratyŭna dasyłać buldozier i adnaŭlać prajezd da damoŭ.
Vyvoziačy śnieh u karjer, raźmieščany ŭ rajonie ZAT «Testa», vadzicieli ŭmudrylisia zavalić zajezd na aŭtadrom DTSAAF. Ranicaj kursanty i instruktary, jakija pryjechali na zaniatki, tolki rukami raźviali. Treniroŭki na aŭtadromie časova admianili.
Kamientujučy hetyja fakty, načalnik Hrodzienskaj haradskoj inśpiekcyi pryrodnych resursaŭ i achovy navakolnaha asiarodździa Andrej Łubin padkreśliŭ, što za naŭmysnaje błakavańnie transpartnych kamunikacyj vinavatyja ŭ hetym mohuć być pakaranyja štrafam ad 6 da 10 bazavych vieličyń (600000—1000000 rubloŭ).
Ciapier praces vyvazki śniehu, i asabliva jaho składavańnia, uziaty pad strohi kantrol. Usiaho vyznačana 12 śniežnych placovak, ich kartu-schiemu možna budzie znajści na sajcie harvykankama.
Jak paviedamiŭ dyrektar «Śpiecaŭtahaspadarki» Alaksandr Žarkoŭ, u adviedzienyja harvykankamam miescy ŭžo vyvieziena bolš za 80 tysiač kubamietraŭ śniehu. I heta kaštavała haradskomu biudžetu 1,8 miljarda rubloŭ. Značnyja vydatki panieśli i pradpryjemstvy, što vyvoziać śnieh sa svaich terytoryj. Darečy, śpiecaŭtahaspadarka maje dastatkovuju kolkaść aŭtamabilaŭ i pahruzčykaŭ, kab akazvać takija pasłuhi lubomu pradpryjemstvu i arhanizacyi. Tady hety praces budzie bolš cyvilizavanym.