Homielskaja milicyja pra zatrymanych vałancioraŭ: Starym pavinna dypamahać ich dzieci

7.02.2013 / 11:19

Homielskaja milicyja ličyć, što starym pavinny dapamahać «zhodna z zakanadaŭstvam» ich dzieci, a nie vałanciory. Tak pres-słužba UUS Homielskaha abłvykankama adreahavała na kanfliktnuju situacyju z vałanciorami, jakaja ŭźnikła ŭ Naraŭlanskim rajonie.

Ubačyŭšy pa telebačańni siužet pra adzinokaha 87-hadovaha piensijaniera, što žyvie ŭ vioscy Bieły Bierah Naraŭlanskaha rajona, nieabyjakavyja žychary Mazyra vyrašyli jamu dapamahčy. Z hetaj metaj 27 studzienia vałanciory sabrali pradukty, rečy i advieźli piensijanieru.

4 lutaha maładyja ludzi znoŭ nakiravalisia ŭ Bieły Bierah, kab dastavić staromu patrebnyja jamu rečy, adnak kala doma piensijaniera ich užo čakała milicyja. Vałancioraŭ advieźli ŭ Naraŭlanski RAUS i skłali ŭ dačynieńni da ich pratakoły pavodle č. 2 art. 16.3 KoAP (parušeńnie patrabavańniaŭ režymu radyjacyjnaj biaśpieki ŭ miascovaściach, jakija padvierhlisia radyjeaktyŭnamu zabrudžvańniu), bo vioska Bieły Bierah znachodzicca ŭ zonie adsialeńnia.

UUS Homielskaha abłvykankama 6 lutaha na svaim sajcie ŭ suviazi z hetym raźmiaściła pres-reliz.

Tam havorycca, što 4 lutaha supracoŭnikami ŭzvoda pa achovie terytoryj radyjacyjnaha zabrudžvańnia AUS Naraŭlanskaha rajvykankama ŭ vioscy Bieły Bierah, raźmieščanaj na terytoryi radyjeaktyŭnaha zabrudžvańnia, byli zatrymany dvoje žycharoŭ Mazyra, jakija nidzie nie pracuć, biez adpaviednaha dazvołu na znachodžańnie ŭ zonie adsialeńnia. Padčas razboru hetyja hramadzianie rastłumačyli, što źjaŭlajucca vałanciorami i akazvajuć dapamohu ŭ vyhladzie biazvypłatnaj pieradačy praduktaŭ charčavańnia sastarełamu Adamu Rahaŭcu, jaki žyvie adzin.

«Supracoŭniki orhanaŭ unutranych spraŭ nie pieraškodzili pieradačy vałanciorami praduktaŭ charčavańnia žycharu adsielenaj vioski.

Adnak prajezd u zonu adčužeńnia patrabuje prytrymlivacca zakonnych patrabavańniaŭ pravił znachodžańnia ŭ zonie radyjeaktyŭnaha zabrudžvańnia», — havorycca ŭ paviedamleńni UUS.

Milicyja «dadatkova paviedamlaje», što Adam Rahaviec «adzinokim nie źjaŭlajecca, bo ŭ jaho jość darosłyja dzieci, jakija zhodna z zakanadaŭstvam abaviazany jaho dahladać».

Akramia taho, pavodle infarmacyi UUS, Naraŭlanski rajvykankam nieadnarazova vydzialaŭ Rahaŭcu žyllo pa-za zabrudžanaj miascovaściu, adnak apošni admoviŭsia. Milicyja śćviardžaje, što administracyjaj Naraŭlanskaha rajona arhanizavana zabieśpiačeńnie piensijaniera praduktami charčavańnia aŭtałaŭkaj u kankretnyja dni tydnia.

Na praciahu miesiaca administracyjny pratakoł u dačynieńni da žycharoŭ Mazyra razhledzić sud.

Čytajcie taksama:

Kamientary da artykuła