Iznoŭ karupcyja: novyja padazravanyja na AAT «MAPID»
Śledčy kamitet zavioŭ novyja kryminalnyja spravy pa rasśledavańni faktaŭ karupcyi z boku słužbovych asobaŭ AAT «MAPID».
U krasaviku 2012 Hienieralnaj prakuraturaj byŭ aryštavany namieśnik dyrektara pa materyjalna-techničnym zabieśpiačeńni doślednaj vytvorčaści «Budprahres» AAT «MAPID».
Paźniej jamu vystavili abvinavačvańnie pa č.3 art.430 Kryminalnaha kodeksa. Pavodle źviestak prakuratury, padazravany sa studzienia 2008 pa sakavik 2012 atrymaŭ chabar u pamiery 25 tysiač dalaraŭ ad kiraŭnika ZTAA «Ałmier» «za spryjalnaje vyrašeńnie pytańnia ab zaklučeńni i pradaŭžeńni terminu dziejańnia damovy arendy składa na terytoryi AP «Budprahres» i za nieakazańnie pieraškod u vykanańni nazvanaj damovy».
Jašče paźniej padazravanamu dadatkova vystavili abvinavačvańnie ŭ ździajśnieńni złačynstva pa č.2 art.424 Kryminalnaha kodeksa (złoŭžyvańnie ŭładaj abo słužbovymi paŭnamoctvami). Pavodle źviestak śledstva, słužbovaja asoba AAT «MAPID» vykarystała ŭ asabistych metach aŭtatranspart, budaŭničyja mašyny i rabotnikaŭ pradpryjemstva, arhanizavała ich niezakonny vyjezd za miežy Minska, dla dastaŭki na jaje dačny ŭčastak u v. Prudok Lepielskaha rajona budaŭničych materyjałaŭ, vykanańnia budaŭniča-ramontnych i inšych rabot, što paciahnuła pryčynieńnie škody AP «Budprahres» AAT «MAPID» na sumu 29 miljonaŭ rubloŭ.
Ciapier Śledčy kamitet vyjaviŭ novyja fakty atrymańnia chabaru, u jakich zamiašanyja słužbovyja asoby inšych budaŭničych kampanij. Tak SK uzbudziŭ kryminalnuju spravu ŭ dačynieńni da byłoha načalnika adździeła prodažaŭ TAA «Frejmchaŭstrejd». Jamu inkryminujecca ździajśnieńnie złačynstva pa č.2 st.431 Kryminalnaha kodeksa (dača chabaru). Pavodle śledstva, padazravany ź lutaha 2009 pa lipień 2011 supolna z dyrektaram nazvanaha tavarystva nie raz pieradavaŭ hrašovyja srodki ŭ vyhladzie chabaraŭ na ahulnuju sumu bolš za 12 miljonaŭ rubloŭ namieśniku dyrektara AP «Budprahres» «za spryjalnaje vyrašeńnie pytańnia ab paskareńni raźlikaŭ pamiž arhanizacyjami».
Dyrektar kamiercyjnaj kampanii vyzvaleny ad kryminalnaj adkaznaści, jak asoba, što dobraachvotna zajaviła ab fakcie dačy chabaru. Rasśledavańnie praciahvajecca.