Dla padrychtoŭki da respublikanskich «Dažynak» spatrebicca kala tryljona rubloŭ

Bolšuju častku srodkaŭ dla padrychtoŭki Žłobina da respublikanskaha fiestyvalu-kirmašu pracaŭnikoŭ vioski «Dažynki-2013» płanujecca vydzielić z abłasnoha biudžetu.

Pavodle papiarednich raźlikaŭ, vydatki na padrychtoŭčyja pracy ŭ rajcentry, jaki sioleta stanie stalicaj «Dažynak», składuć kala tryljona rubloŭ, paviedamiŭ na pres-kanfierencyi 18 sakavika staršynia abłvykankama Uładzimir Dvornik. Hetaja suma spatrebicca dla pryviadzieńnia ŭ paradak usioj infrastruktury Žłobina i rajona, a taksama dla zakančeńnia budaŭnictva abjektaŭ sacyjalnaha pryznačeńnia. «U pryncypie, Žłobin nie abdzieleny abjektami infrastruktury — tam jość usio, što nieabchodna dla narmalnaha žyćcia, adznačyŭ Dvornik. — Tamu hałoŭnaja zadača — zrabić hety horad pa-sapraŭdnamu kamfortnym».

Asnoŭnaja častka srodkaŭ budzie vydzielenaja z abłasnoha biudžetu, zajaviŭ hubiernatar, bo Homielski rehijon bolš za ŭsio zacikaŭleny ŭ stvareńni na jaho terytoryi horada, pryvabnaha pa ŭsich kryterach. U Žłobinie da «Dažynak» buduć uviedzienyja novyja abjekty — hatel na 114 miescaŭ, dziciačy sad, univiersalnaja zała hulniavych vidaŭ sportu. Buduć dobraŭparadkavanyja pryvakzalnaja płošča i aŭtavakzał, šerah vulic, sacyjalnych abjektaŭ i zon adpačynku. Miascovy krajaznaŭčy muziej pierabiarecca ŭ novy budynak.

Respublikanski fiestyval-kirmaš«Dažynki-2013» razhorniecca ŭ Žłobinie i Žłobinskim rajonie ŭ druhoj pałovie vieraśnia. Rasparadžeńnie ab hetym było padpisana Alaksandram Łukašenkam u pačatku lutaha hetaha hoda.

Na pres-kanfierencyi kiraŭnik vobłaści vykazaŭsia taksama za adradžeńnie respublikanskaha śpiecyjalizavanaha Darožnaha fondu, jaki spyniŭ isnavańnie ŭ 2009 hodzie. Abjom finansavańnia na praviadzieńnie darožnaha budaŭnictva i padtrymańnie daroh u naležnym stanie z tych časoŭ pamienšyŭsia ŭ try razy. A darohi rehijona — adny z samych zahružanych u krainie. Asabliva abvastryłasia darožnaja situacyja paśla niespryjalnych umovaŭ nadvorja ciapierašniaj zimy. «Darohi, uzrost jakich składaje 15–20 hadoŭ, choć i patrabujuć surjoznaha jamavaha ramontu, u cełym vytrymali, — skazaŭ Uładzimir Dvornik. — A voś na darozie M10 ad Kalinkavičaŭ da Žytkavičaŭ, pabudavanaj u 1967 hodzie, paškodžana 30% pakryćcia — tut nieabchodna mianiać asfalt całkam».

Pavodle słovaŭ staršyni abłvykankama, na praviadzieńnie ramontnych rabot urad krainy płanuje vyłučyć značnyja srodki. «Viadoma, na peŭny čas heta dapamoža vyrašyć prablemu. I ŭsio ž adnaŭleńniu byłoj jakaści biełaruskich daroh, na maju dumku, šmat u čym mahło b paspryjać adnaŭleńnie darožnaha fondu», — adznačyŭ Uładzimir Dvornik. Jon padkreśliŭ, što kiraŭnictva vobłaści padtrymaje takuju inicyjatyvu, kali jaje inicyjuje halinovaje ministerstva.

Kamientary da artykuła