Vysoki čyn: Na futbolnym stadyjonie treba ŭsich nadhledzieć. A kali niejki admarozak ŭsio padarvie?

Vy zhodnyja z hetym? A jak u inšych krajach?

Namieśnik načalnika milicyi hramadskaj biaśpieki HUUS Minharvykankama Maksim Hryščanka miarkuje, što dahlad na stadyjonach Biełarusi — abaviazkovaja pracedura.

«Mianie na stadyjonie pavinny dahledzieć.

Vybačajcie, što značyć toje, što mianie na stadyjonie nadhledzieli. Mianie źniavažyli? Dy nie źniavažyli!

Znoŭ ža iduć niekalki čałaviek i voźmuć z saboj kastety, nažy i dastanuć i pačnuć rezać na stadyjonie adzin adnaho. I što tady?

Na „Minsk-Arenie“ inšaja situacyja. Ludzi iduć narmalna, z dobrym nastrojem. I nie nastrojvajuć siabie, što mianie źniavažać pry nadhladzie», — zajaviŭ Hryščanka ŭ chodzie sieminara Biełaruskaj fiederacyi futboła pa pytańniach biaśpieki na stadyjonach, Goals.by.

Pytańnie pilnaha, a časam źniavažlivaha staŭleńnia milicyi da zaŭziataraŭ na stadyjonach nieadnarazova ŭzdymałasia na internet-forumach, u zaŭziatarskim asiarodździ i žurnalistami.

Tak, u sieradu źjaviŭsia adkryty list zaŭziataraŭ futbolnaha kłuba «Dynama-Brest», aburanych staŭleńniem minskaha AMONa padčas čverćfinalnaha matču na Kubak Biełarusi, što prajšoŭ u Minsku 17 sakavika.

U liście, u pryvatnaści, havaryłasia: «Arhanizacyja nadhladu supracoŭnikami AMAPu, a taksama ich prysutnaść na siektary z aktyŭnymi zaŭziatarami pry isnujučym z boku „achoŭnikaŭ paradku“ pieraduziatym staŭleńni da zaŭziataraŭ, jak da złačyncaŭ-recydyvistaŭ, viadzie da stvareńnia kanfliktnych situacyj i dyskredytacyi pravaachoŭnych orhanaŭ. Całkam vidavočna, što supracoŭniki AMONa (atrada milicyi śpiecyjalnaha pryznačeńnia) zaklikanyja vyrašać absalutna inšyja zadačy — praduchileńnie masavych biesparadkaŭ, supraćstajańnie arhanizavanym złačynnym hrupam i inš, ale nie dahlad zaŭziataraŭ na futbolnych matčach i vyznačeńnie „lehitymnaści“ banieraŭ, šalikaŭ i inšaj zaŭziatarskaj atrybutyki. Dla harantavańnia biaśpiečnych i ŭ toj ža čas kamfortnych umoŭ na trybunach padčas praviadzieńnia futbolnych matčaŭ, stvareńnia na siektary zyčlivaj atmaśfiery, hetuju funkcyju biezumoŭna pavinny vykonvać arhanizavanyja kłubami (Fiederacyjaj) słužby biaśpieki, tak zvanyja ściuardy. Na pierachodnym etapie ličym dapuščalnym uskładańnie takich abaviazkaŭ na padraździaleńni Ministerstva ŭnutranych spraŭ, jakija nie adnosiacca da liku śpiecyjalnych».

Aburyŭsia siońnia na sieminary staŭleńniem milicyi da zaŭziataraŭ i pieršy namieśnik staršyni Biełaruskaj fiederacyi futboła Siarhiej Safarjan:

«Ja mahu na svaim horkim vopycie skazać, što kali ja idu praz zvyčajny ŭvachod na stadyjon, to mianie sustrakajuć niepryjemnym pytańniem: „Kudy idzieš?“. Pryčym heta pramaŭlajecca takim tonam, jak byccam ja złačyniec.

Kamientary da artykuła