Adstaŭny pałkoŭnik z Maskvy choča ŭstalavać pomnik Kupału ŭ Hłybokim
Dla taho, kab na vulicy, dzie žyła muza paeta, Paŭlina Miadziołka, paŭstaŭ pomnik Janku Kupału, nie staje tolki dazvołu rajvykankamu. Z architektarami i fundatarami entuzijast rodnych miaścin, Anton Sabaleŭski, užo damoviŭsia.
Janka Kupała |
Da 13 žniŭnia pałkoŭnik u adstaŭcy Anton Sabaleŭski spadziajecca atrymać list ad staršyni Hłybockaha rajvykankamu Michaiła Kandzierskaha. U paniadziełak budzie roŭna miesiac, jak veteran prasiŭ vertykalniykaŭ razhladzieć prapanovu miascovych žycharoŭ nakont ustalavańniu pomnika Janku Kupału ŭ honar jahonaha 125‑hodździa.
— Prośba nie nadumanaja, — kaža Anton Alaksandravič. — Jašče ŭ 2004 hodzie za ŭłasnyja hrošy ja nabyŭ i pieradaŭ u Hłybocki historyka‑etnahrafičny muzej 70‑santymetrovuju bronzavuju vyjavu Janki Kupały. Heta praca biełaruskaha skulptara Valarjana Januškieviča.
Hutarym z Antonam Sabaleŭskim u sadku la domu jahonaha baćki. Viasioły i ruchavy pałkoŭnik va ŭzroście za 70. Stała žyvie ŭ Maskvie, dzie i słužyŭ. Ale nie minaje hodu, kab jon nie pierabiraŭsia na leta ŭ Hłybokaje. Sioleta tut naniaŭ specyjalistaŭ, pierakryli dach. Vierch dychtoŭnaj jašče chaty zichacić ciapier na soncy blaskam acynkavanaj blachi. Ujaŭlajecca, što smalistyja ścieny — viečnyja.
— Vidać, chutka pierabiarusia siudy, — tłumačyć maskvič, — tut radnia, a ŭ Miensku — brat. Taksama padzielimsia hrašyma na dobruju spravu. Połaččynu ŭpryhožvajuć manumentalnyja skulptury Eŭfrasińni Połackaj, Franciška Skaryny i Simiaona Połackaha. Janka Kupała vielmi dobra b dapasavaŭ im u Hłybokim, — pierakonvaje surazmoŭca.
Mahčymym miescam ustalavańnia skulptury nazyvajecca pačatak vulicy, jakaja raniej mieła nazvu «Dziśnienskaja». Arhumenty Antona Sabaleŭskaha:
—U krajni tut dom ŭ 1898 hodzie pryjechała siamja Miadziołki — arhanista miascovaha kaściołu. Dačcy Paŭlincy tady było piać hadkoŭ. Paźniej u knizie padsumavańnia «Ściežkami žyćcia» jana napiša, što ŭ Hłybokim skončyła carkoŭna‑prychodzkuju škołu, dzie ŭpieršyniu paznajomiłasia ź biełaruskaj movaj: pa pamiaci deklamavała vieršy Franciška Bahuševiča sa zbornika «Dudka biełaruskaja».
U Hłybokim Paŭlina Miadziołka ŭžo dziaŭčynaj była ŭdzielnicaj pastanovak pavodle kupałavych pjes. Ličycca, što mienavita ź jaje i dla jaje byŭ napisany vobraz bieśśmiarotnaj «Paŭlinki».
Paet i Muza paznajomilisia ŭ 1908 hodzie, u Vilni. Ich idejnaja jednaść paspryjała liryčnaj historyi kachańnia…
Skulptar Valarjan Januškievič daŭ zhodu na raspracoŭku prajekta pomnika na miescy jaho ŭstalavańnia. Jość papiaredniaja zhoda kiraŭnikoŭ niekatorych kamercyjnych bankaŭ Biełarusi na finansavańnie hetaha prajektu. Dačakajemsia adkazu z Hłybockaha rajvykankamu. Chočacca spadziavacca na stanoŭčy vynik, bo duža ideja pryvabnaja: dzie Paŭlinka, tam i Kupała.