Historyk pra kostki la «Piekina»: Chutčej za ŭsio davajenny ci paślavajenny pieryjad
7 maja Śledčy kamitet paćvierdziŭ fakt znachodki na miescy budaŭnictva hatela «Piekin» kostak, jakija nahadvajuć čałaviečyja pareštki. Ale kamu jany mohuć naležać? «Naša Niva» źviarnułasia z hetym pytańniem da historyka Ihara Kuźniacova.
«Nakolki mnie viadoma, terytoryja sučasnaha parka 40-hodździa Kastryčnika nie była miescam masavych rasstrełaŭ ci zachavańniaŭ ludziej. Naŭrad ci heta i pareštki vajskoŭcaŭ časoŭ vajny — u Minsku bajavych dziejańniaŭ amal nie viałosia. Taksama małavierahodna, što kostki naležać achviaram akupacyi, bo nacysty nie chavali ich u horadzie.
Ja miarkuju, što heta pachavańnie davajennaha ci paślavajennaha pieryjadu. Usia nadzieja na ekśpiertyzu, jakaja ŭstanović, da jakoha času adnosicca pachavańnie i, mabyć, kamu naležać pareštki.
Adnak, ja na jaje nie nadta raźličvaju, bo ŭ dziaržavie isnuje tendencyja pryznavać padobnyja zachavańni mohiłkami achviaraŭ akupacyi i spyniać na hetym spravu. Navat u tych vypadkach, kali viadoma pra rasstreły — takoje było ŭ adnoj ź viciebskich cerkvaŭ, jakaja była miescam katavańniaŭ. U Biełarusi tolki Kurapaty pryznanyja miescam rasstrełaŭ i pachavańniaŭ achviaraŭ stalinizmu, choć nasamreč takich miescaŭ sotni.
Chutčej za ŭsio pra pareštki z parka 40-hodździa Kastryčnika skažuć, što pa prašeści 60 ci 70 hadoŭ identyfikavać ich prynaležnaść niemahčyma», — skazaŭ Kuźniacoŭ.