Biełhazprambank kupiŭ na Sothbey's 4 karciny Šahała i Sucina za $3 młn
«Samnambuła», Mark Šahał.
«Hadzińnik na pałajučym niebie», Mark Šahał.
«Zialony piejzaž», Mark Šahał.
«Jeva», Chaim Sucin.
Udała skłalisia niadaŭnija tarhi sučasnaha mastactva na ńju-jorkskim aŭkcyjonie Sothbey's dla Biełhazprambanka, jaki nabyŭ čatyry kaštoŭnych łota, paviedamlaje tut.by. Mastackuju kalekcyju banka ŭ bližejšy čas papoŭniać karciny Marka Šahała i Chaima Sucina, stvoranyja ŭ pieryjad roskvitu hetych mastakoŭ.
Praca «Le somnambule» («Samnambuła») Marka Šahała datavana 1911—1912 hh. Jana vykananaja huaššu i ałoŭkam na papiery. Małady mastak u hety čas skončyŭ vučobu ŭ Viciebsku ŭ Judela Pena, paznajomiŭsia sa svajoj muzaj Bełaj, pierajechaŭ u Paryž i žyŭ u lehiendarnym paryžskim «Vulli». Heta byŭ ramantyčny i niepaŭtorny čas jašče da dvuch suśvietnych vojnaŭ i zadoŭha da suśvietnaj słavy, jakaja abrynułasia na našaha suajčyńnika. Karcina była nabyta za $341000, paviedamlaje aficyjny sajt aŭkcyjonnaha doma Sothbey's.
Inšyja karciny Šahała «Pendule au ciel embrase» («Hadzińnik na pałajučym niebie») i «Paysage vert» («Zialony piejzaž») stvorany ŭ kancy 40-ch hh. U hety čas majstar, jaki ŭžo atrymaŭ suśvietnaje pryznańnie, na niekalki hadoŭ viarnuŭsia ŭ Francyju z ZŠA. Za «Hadzińnik na pałajučym niebie» biełaruskamu banku pryjšłosia vykłaści $605000, za «Zialony piejzaž» — $137000.
Narešcie, znaŭcy mastactva ŭ bližejšy čas zmohuć acanić pracu Chaima Sucina «Eva» («Jeva») 1928 — heta załaty pieryjad tvorčaści mastaka. U hety čas užo adbyłasia pieršaja piersanalnaja vystava Sucina ŭ adnoj z paryžskich halerej i jon paznajomiŭsia z Marselenam i Madlen Kasten, jakija ŭ nastupnyja hady voźmuć apieku nad im. «Jeva» abyšłasia Biełhazprambanku ŭ $1,8 młn.
Nahadajem, da 2012 hoda na radzimie Sucina ŭ Biełarusi nie było nivodnaj jaho karciny. Karcina «Vialikija łuhi ŭ Šartr» (jak miarkujecca, 1934) była nabyta Biełhazprambankam 8 lutaha 2012 h. na aŭkcyjonie Christie's. Jana stała sapraŭdnym upryhožańniem unikalnaha art-prajekta «Mastaki Paryžskaj škoły ź Biełarusi. Z kalekcyi Biełhazprambanka, muziejnych i pryvatnych zborach». Darečy, niadaŭna z kalekcyjaj paznajomiŭsia kiraŭnik «Hazproma» Alaksiej Miler.
Varta taksama adznačyć, što ŭ mai pałatno Chaima Sucina «Maleńki kandytar» ustalavała suśvietny rekord. Jano było pradadziena na tarhach aŭkcyjonnaha doma Christie's u Ńju-Jorku za $18 młn. Acenačny košt karciny, napisanaj kala 1927, składaŭ $16–22 młn. Karcina Šahała «Try akrabata» pajšła z małatka na Christie's za $13 młn.
Čytajcie taksama:
Kamientary da artykuła