U Minsku zhareła bujnaja łabaratoryja pa vyrabie marychuany
Ranicaj 27 maja ŭ Minsku ŭ adnym z pryvatnych damoŭ pa vulicy Nadzieždzinskaj adbyŭsia pažar. Paśla tušeńnia pažaru ratavalniki vyklikali milicyju.
Jak paviedamili ŭ HUUS Minharvykankama, akazałasia, što ŭ domie, dzie adbyŭsia pažar, abstalavana bujnaja łabaratoryja pa vytvorčaści marychuany. Ceły pakoj byŭ vydzieleny pad vyroščvańnie raślin, druhi — dla prasuški. Pry hetym technałahičny praces vykonvaŭsia na vielmi vysokim uzroŭni. U pakoi padtrymlivałasia nieabchodnaja dla raślin tempieratura, vilhotnaść, vientylacyja pavietra. Usio heta zabiaśpiečvałasia śpiecyjalnym abstalavańniem: lampami, vyciažkami, vientylatarami. U ahulnaj składanaści ŭ pieršym pakoi kanfiskavana 20 kustoŭ vyšynioj ad paŭtara da dvuch mietraŭ. U druhim pakoi — kala 700 hramaŭ vysušanaj marychuany.
Kali ratavalniki vyklikali milicyju, haspadar doma źbieh. Tym nie mienš 35-hadovy minčanin zatrymany, u ciapierašni čas jon daje pakazańni apieratyŭnikam staličnaha narkakantrolu. Viadoma, što da niadaŭnich časoŭ zatrymany doŭhi čas žyŭ u Niderłandach.
Pa adnoj ź viersij, uzharańnie mahło adbycca z-za karotkaha zamykańnia, jakoje, u svaju čarhu, było vyklikana vykarystańniem vialikaj kolkaści elektrapryboraŭ, jakija absłuhoŭvajuć narkałabaratoryju.