Redaktara i vydaŭca niezaležnaj kryčaŭskaj haziety vyklikajuć u sud

Načalnik arhanizacyi A. V. Frałoŭ prosić sud Kryčaŭskaha rajona «pryznać raspaŭsiudžanyja źviestki ab KUP „Čerykaŭskaje PMK-280“ u drukavanym vydańni „Volny horad“ № 4 ad 3 lutaha 2013 hoda nieadpaviadajučymi rečaisnaści», a taksama «abaviazać drukavanaje vydańnie „Volny horad“ nadrukavać abviaržeńnie na toj ža staroncy ŭ toj ža kałoncy dadzienaha drukavanaha vydańnia».

— Pazoŭ «Ab abaronie dziełavoj reputacyi» padaŭ načalnik UKP «Čerykaŭskaje PMK № 280» A. V. Frałoŭ, byccam by my ŭ adnym z numaroŭ «Volnaha horada» u artykule «Pryhonnyja» dali niedakładnyja źviestki pra hetu arhanizacyju, — cytuje redaktara haziety «Volny horad» Siarhieja Niaroŭnaha sajt baj.by. — Raniej pa hetym pytańni mianie i Kudraŭcava vyklikali ŭ Kryčaŭski RAUS, kudy prychodziŭ zapyt z čerykaŭskaj milicyi, adnak achoŭniki pravaparadku admovili administracyi PMK № 280 va ŭzbudžeńni kryminalnaj spravy.

Siarhiej Niaroŭny kaža, što jaho ŭ hetaj situacyi vielmi ździŭlajuć dziejańni administracyi PMK № 280.

— Pa-pieršaje, hetaje pytańnie lohka možna było vyrašyć u dasudovym paradku. Kali b supracoŭniki arhanizacyi chacieli dziejničać u adpaviednaści z Zakonam ab ŚMI, jany b źviarnulisia da nas z patrabavańniem apublikavać udakładnieńnie albo abviaržeńnie. My b praviali pravierku i, kali b paćvierdziłasia, što infarmacyja niedakładnaja, abaviazkova heta zrabili, — tłumačyć redaktar «Volnaha horadu». — Pa-druhoje, ździŭlaje palityzavanaść pazovu ŭ sud, bo administracyja PMK № 280 ubačyła ŭ našym nievialikim artykule adnu metu — «dyskredytavać kirujučaje źviano „Čerykaŭskaha PMK-280“ i rajonnuju viertykal ułady». Na maju dumku, užo z hetaha vydatna bačna, chto źjaŭlajecca sapraŭdnym inicyjataram hetaha pazovu…

Taksama ździŭlaje niedarečnaść, jakuju dapuściła administracyja PMK № 280 pry padrychtoŭcy pazovu ŭ sud: pa ŭsim tekście nazva arhanizacyi idzie jak UKP «Čerykaŭskaja PMK-280», a padpisany dakumient načalnikam «Čerykaŭskaha PMK-88» A. V. Frałovym.

— Užo adna heta akaličnaść pakazvaje ŭzrovień adnosin z boku administracyi ŭstanovy da vartaści hetaha dakumienta, — kamientuje Siarhiej Niaroŭny.

Artykuł «Pryhonnyja» byŭ napisany paśla telefanavańnia ŭ redakcyju «Volnaha horada» žonki pracaŭnika Čerykaŭskaj PMK № 280. Žančyna śćviardžała, što jaje muž nie moža atrymać zarobak užo treci miesiac. Žurnalisty haziety paraili joj źviarnucca pa dapamohu ŭ Kryčaŭskuju miežrajonnuju inśpiekcyju pa achovie pracy.

Niezaležnaja hazieta «Volny horad» vydajecca nakładam 299 asobnikaŭ, raspaŭsiudžvajecca na terytoryi Kryčaŭskaha i susiednich rajonaŭ uschodniaj Mahiloŭščyny.

Kamientary da artykuła