Nie padbirajcie ptušaniat, jakija vylecieli z hniazda
HA «Achova ptušak Baćkaŭščyny» (APB) zaklikaje nasielnictva nie padbirać ptušaniat, jakija vylecieli z hniazda.
Pavodle źviestak APB, u bolšaści vypadkaŭ takija ptušaniaty ŭ chatnich umovach hinuć, pakolki vykarmić ich nie zaŭsiody ŭdajecca navat prafiesijanałam. Śpiecyjalisty rajać nie čapać vypaŭšych ptušaniat, nie padbirać ich i nie nieści dadomu. Kali ptušania ŭpała na ažyŭlenuju darožku ci było atakavana sabakami, jaho možna pierasadzić na najbližejšy kust ci halinu pavyšej, ale paśla hetaha čałavieku lepš jak maha chutčej syści.
«Pamiatajcie, što baćki nie kinuli ptušania, jany znachodziacca pobač — chacia vy možacie ich i nie bačyć — i pakłapociacca pra jaho.Źlotki — ptušynyja dzieci, i rodnyja maci z tatam navučać ich žyćciu značna lepš za luboha čałavieka», — havorycca ŭ paviedamleńni APB.
Śpiecyjalisty taksama rajać na čas hniezdavańnia ŭstrymacca ad prahułak z sabakami biez pavadkoŭ na lubych zialonych učastkach, admovicca ad hučnaj muzyki, vybirajučysia na pryrodu ci ŭ park, pieranieści padrezku kustoŭ i dreŭ na bolš poźni čas, a taksama ŭstrymacca ad razborki starych kastroŭ i inšych zručnych dla hniezdavańnia ptušak miescaŭ, pakul ptušaniaty nie pakinuć hniozdy.