Uščylnieńnie Malinaŭki: žychary staličnaha mikrarajona suprać handlovaha centra pad voknami
«Handlovy centr na Rafijeva» paŭstanie ŭ kastryčniku 2014 hoda.
— Ja žyvu za dva prypynki ad hetaj budoŭli, — raskazvaje Valeryj, žychar Malinaŭki. — Ja niejak išoŭ viasnoj, a tut užo abharadzili placoŭku. Pačaŭ šukać pašpart abjekta, a jaho niama. Tady padyšoŭ, vidać, da načalnika i zapytaŭsia, što tut budzie. Ale jon mnie nahrubiŭ:
«Što treba, toje i budzie. A pašpart źjavicca, kali pačniom budavać. I možacie nikudy nie pisać skarhi, usio adno pabudujem».
Valeryja aburyła takoje staŭleńnie. Jon pazvaniŭ u administracyju rajona, kab pacikavicca, što ŭsio-tki tut źjavicca. Ale tam paprasili paźniej pieratelefanavać. A zatym i zusim nie adkazvali.
— Voś i kazino adčynili, — pakazvaje na kłub hulniavych aŭtamataŭ, što pracujuje pad adnym dacham z univiersamam «Rubloŭski». I akurat nasuprać budujecca novy handiołvy centr.
Na aharodžy ŭžo visić pašpart abjekta. Źjaviŭsia, napeŭna, paśla taho, jak žychary bližejšych damoŭ pačali skardzicca ŭ administracyju rajona.
— Z kramami tut prablem niama, — praciahvaje Valeryj. — A voś kab pabudavali jašče basiejn, a to adzin na ŭvieś rajon.
Kali Valeryju nie nadta zaminaje novaja budoŭla, to žychary bližejšych damoŭ pa vulicy Rafijeva nie ŭ zachapleńni ad hetaha. Raniej možna było prajścisia tut, vyhulać sabaku. I rašeńnie pryniali biez hramadskich abmierkavańniaŭ.
Budoŭla padstupaje pad samyja vokny.
Vid na prybiralniu taksama nie raduje žycharoŭ doma 66 pa vuł.Rafijeva.
— Malinaŭka i tak sucelna zabudavanaja. Navošta nas pazbaŭlać jašče adnaho kavałka zialonaj zony?
— aburajecca Taćciana, žycharka susiedniaha doma. — Nie patrebny hety handlovy centr. Tut ža pa roznyja baki darohi «Rublovskij» i rynak MAXIMUS, niedaloka, na Rafijeva,56 adčyniŭsia supiermarkiet «Vitalur». Chiba chleba niama dzie kupić?
Taćciana kaža, što ŭ novym centry budzie supiermarkiet «Sosiedi», krama «Elektrasiła», dziciačy zabaŭlalny centr, cyrulnia. A hramadskija abmierkavańni nie pravodzilisia, bo, jak adkazali na zvarot z administracyi Maskoŭskaha rajona, jany i nie pavinny pravodzicca. Pakolki majecca horadabudaŭničy prajekt detalnaha płanavańnia. A praduktovaja krama na hetym skryžavańni była zapłanavana jašče ŭ 2007 hodzie.
— Jany zabrali kavałak ziamli i prosta pad nosam u ludziej budujuć. A paśla ž jašče i zadni dvor supiermarkieta budzie vychodzić na damy: a hety pastajanny šum. Źbirali podpisy pad kalektyŭnym zvarotam. Tolki ci prysłuchajucca da nas u vysokich kabinietach? Lepš by zrabili parkoŭku, — aburajecca žančyna. My staim na tratuary, a pobač pryparkavanyja aŭto. — A vy pahladzicie ŭviečary, jak zastaŭlena Rafijeva ŭzdoŭž — nivodnaha volnaha miesca.
Niechta ž nie bačyć prablemy. Maŭlaŭ,
lepš dvuchpaviarchovy handlovy centr, čym 12-paviarchovy dom — «vokny ŭ vokny».
Darečy, za jakija 50 mietraŭ ad hetaj znachodzicca inšaja budoŭla — siudy ź Niamihi pieranosiać paviljon «Chutkaje charčavańnie». Praŭda, data zakančeńnia pracy paznačana krasavikom. A ciapier užo červień. I akramia katłavana i składzienych došak ničoha nie ŭkazvaje na niejkuju pracu.