Snoŭden zasieŭ u Maskvie, Pucin paraŭnaŭ jaho z parasiom
Ź niajasnych pryčyn biehły amierykanski vyviednik ad niadzieli zavis u tranzitnaj zonie Šaramiećjeva.
Voś užo dvoje sutak Snoŭden znachodzicca ŭ Šaramiećjevie.
Jahonaje znachodžańnie tam u aŭtorak pryznaŭ prezident Rasii Uładzimir Pucin. I adkamientavaŭ tranzit 29-hadovaha ŭciekača z Ahienctva pa nacyjanalnaj biaśpiecy ZŠA va ŭłaścivaj sabie źjedlivaj maniery.
Jak i Asanž ź Vikiliks, skazaŭ Pucin, «Snoŭden ličyć siabie pravaabaroncam i zmahajecca za raspaŭsiud infarmacyi. Zadajcie sabie pytańnie: ci treba takich ludziej vydavać dla pasadki ŭ turmu abo nie treba? U kožnym razie, ja b nie chacieŭ by zajmacca takimi pytańniami, bo heta ŭsio adno što parasia stryhčy: visku šmat, a voŭny mała», — skazaŭ Pucin, jaki pierabyvaje ź vizitam u Finlandyi. «Jon, jak tranzitny pasažyr, maje prava kupić bilet i lacieć, kudy jon choča», — dadaŭ jon.
«Spadar Snoŭden — čałaviek volny, čym chutčej jon abiare kančatkovy punkt svajho znachodžańnia, tym budzie lepš i dla nas, i dla jaho», — niedvuchsensoŭna namiaknuŭ Pucin.
Tym časam amierykanskija ŚMI publikujuć krytyčnyja materyjały na adras Rasii, jakaja nie pryniała mieraŭ dla vydačy Snoŭdena Złučanym Štatam.
Dla amierykanskich libierałaŭ i libiertaryjancaŭ Snoŭden — hieroj zmahańnia za pravy čałavieka. Dla kansiervataraŭ i dziaržaŭnikaŭ — zdradnik i špijon.
U niadzielu Edvard Snoŭden pakinuŭ Hankonh. U jaho byŭ bilet da Havany praz Maskvu. Ale na borcie rejsa na Kubu jaho nie akazałasia. Ekvador abvieściŭ, što Snoŭden paprasiŭ palityčnaha prytułku ŭ hetaj krainie. Hetaja prośba ciapier razhladajecca.