Biełaruś — samaje słabaje źviano va Uschodnim partniorstvie
Pra heta zajaviŭ kiraŭnik kamiteta pa zamiežnych spravach siejma Litvy Bieniedyktas Juodka 26 červienia padčas kansultacyj biełaruskich i litoŭskich demakratyčnych partyj, jakija prachodziać u litoŭskim parłamiencie.
Jon zaznačyŭ, što ŭ adnosinach ES ź inšymi krainami — udzielnicami Uschodniaha partniorstva «spravy iduć davoli niabłaha». «Spadziajomsia, naprykład, što padčas samita ŭ listapadzie my padpišam pahadnieńnie ab asacyjacyi z Ukrainaj», — skazaŭ Juodka.
Pavodle jaho słoŭ, adna z hałoŭnych prablem u adnosinach ź Biełaruśsiu zaklučajecca ŭ tym, što niajasnym zastajecca, čaho choča kraina.«Niezrazumieła, jana choča być bližej da Jeŭrasajuza ci bližej da Jeŭrazijskaha sajuza razam z Rasijaj i Kazachstanam, — skazaŭ Juodka. — A kali niajasna, čaho choča sama kraina, vielmi ciažka tym, chto sprabuje joj dapamahčy. Ja byŭ ździŭleny, što navat siarod biełaruskaj apazicyi niama adzinaha mierkavańnia ab hieapalityčnych metach Biełarusi».
Jak zaznačyŭ kiraŭnik kamiteta pa zamiežnych spravach siejma Litvy, ES važna viedać, što adbyvajecca ŭ Biełarusi. «My sočym za pracesami, što adbyvajucca ŭ krainie», — padkreśliŭ jon.
«Demakratyju i los krainy vyznačaje sama kraina, — skazaŭ jon. — Demakratyju nielha ekspartavać. Jana stvarajecca ŭnutry krainy, ale vučycca vam treba ŭ vašych susiedziaŭ, kali vy dumajecie, što jany žyvuć lepš. Hałoŭnaja ž meta demakratyi — kab ludzi žyli dobra».Juodka zaznačyŭ, što dla ES važna, kab Biełaruś była «prahnazavanym susiedam», ale vučyć krainu demakratyi «nichto nie maje prava».