«Raskosmas» choča kupić błokpakiet biełaruskaha AAT «Pielenh»

«Raskosmas» raźličvaje kupić błokpakiet akcyj biełaruskaha AAT «Pielenh» u ramkach realizacyi adnaho ź piaci biełaruska-rasijskich intehracyjnych prajektaŭ.

«Biełaruskaje pradpryjemstva „Pielenh“ maje patrebu ŭ harantavanym supracoŭnictvie i zakazach z boku Rasii. Adnoj z formaŭ harantyj ja baču ŭvachodžańnie ŭ statutny kapitał, prynamsi nie mienš, čym błokpakiet», — zajaviŭ kiraŭnik «Raskosmasa» Uładzimir Papoŭkin žurnalistam u Minsku. U čaćvier jon prybyŭ u Minsk na pieramovy pa kupli hetaha paśpiachovaha biełaruskaha pradpryjemstva. Papoŭkin nie chavaŭ, što padčas svajoj sustrečy z prem'jer-ministram Biełarusi Michaiłam Miaśnikovičam maje namier abmierkavać dolu i ŭmovy pieradačy «Raskosmasu» akcyj «Pielenha».

Adnak mienavita pra heta — na jakich umovach Biełaruś pradaje «Pielenh» — pa vynikach sustrečy i nie paviedamili, radasna adrapartavaŭšy tolki pra płany pavieličeńnia biełaruska-rasijskaj kaśmičnaj hrupoŭki.

Cikava, što jašče hod tamu «Raskosmasu» było dastatkova 48,9% akcyj biełaruskaj pramysłovaj hrupy «Pielenh». Heta pakiet, jakim na toj momant vałodała biełaruskaja dziaržava. Astatnija 51,1% naležali pracoŭnamu kalektyvu.

Pryčym cikava, što «Pielenh» viadomy nie stolki svaimi kaśmičnymi prajektami, kolki prycelnymi kompleksami dla sistem kiravańnia ahniom dla braniatankavaj techniki. Heta viadučaje prajektna-kanstruktarskaje pradpryjemstva Biełarusi ŭ halinie aptyčna-elektronnaha pryborabudavańnia. Było stvoranaje ŭ 1974 hodzie šlacham rearhanizacyi kanstruktarskaha adździeła Minskaha miechaničnaha zavoda imia Vaviłava (jaki ŭvachodziŭ u skład BiełOMA) u Centralnaje kanstruktarskaje biuro «Pielenh». U 1994 hodzie pieraŭtvorana ŭ AAT «Pielenh». Akramia ŭsiaho inšaha, heta adno z samych vysokarentabielnych biełaruskich pradpryjemstvaŭ. Prynamsi, jano było adnym z samych dachodnych dla pryvatnych akcyjanieraŭ, choć praź śpiecyfičnaść vytvorčaści ab mnohich kantraktach «Pielenha» šyrokaj publicy nieviadoma.

Kamientary da artykuła