Ekśpierty prahnazujuć da kanca vieraśnia aficyjny kurs dalara: 8.820—9.100

Pavodle prahnozaŭ ekśpiertaŭ, da kanca treciaha kvartała 2013 hoda aficyjny kurs dalaara ZŠA ŭ Biełarusi moža dasiahnuć 9.100 rubloŭ. Takija acenki pryvodziacca ŭ kansiensus-prahnozie, jaki pa vynikach apytańnia ekśpiertaŭ padrychtavała rasijskaje ahienctva Sbonds, što śpiecyjalizujecca na vyvučeńni finansavych rynkaŭ.

Na dumku ekśpiertaŭ biełaruskaha «BiełŚvisBanka», acenki jakich pryviedzieny ŭ kansiensus-prahnozie, da kanca treciaha kvartała aficyjny kurs dalara składzie 8.820 rubloŭ.

Razam z tym inšyja ŭdzielniki apytańnia prahnazujuć, što kurs budzie krychu vyšejšy. Tak, pradstaŭniki «ViestBiźniesHrup» (prafudzielnik biełaruskaha rynku kaštoŭnych papier) miarkujuć, što aficyjny kurs dalara da kanca vieraśnia składzie 8.950 rubloŭ. Ekśpierty Sbonds, u svaju čarhu, čakajuć, što aficyjny kurs dalara składzie 9.000 rubloŭ.

Analityki aficyjnaha partniora «Alpary» ŭ Minsku prahnazujuć, što ŭ kancy treciaha kvartała aficyjny kurs dalara składzie 9.100 rubloŭ.

«Inflacyja, pavodle našych acenak, zachavajecca prykładna na tym ža ŭzroŭni, što i ŭ pieršym paŭhodździ, i składzie ŭ trecim kvartale prykładna 0,7% u miesiac. Na hetym fonie možna čakać i niekatory rost kursu dalara, pakolki ŭ advarotnym vypadku adbudziecca prykmietnaje ŭmacavańnie realnaha efiektyŭnaha kursu rubla, što budzie vielmi baluča dla našaj ekanomiki», — patłumačyŭ prahnoz na treci kvartał finansavy analityk aficyjnaha partniora «Alpary» ŭ Minsku Vadzim Iosub.

Jak paviedamlałasia raniej, biełaruskija ŭłady pry padrychtoŭcy biudžetu na 2013 hod vyznačyli siaredniehadavy kurs dalara na ŭzroŭni 8.950 rubloŭ. U kancepcyi prahnozu sacyjalna-ekanamičnaha raźvićcia, jakuju padrychtavali ekanamičnyja ŭłady, ukazvajecca, što siaredniehadavy kurs dalara ŭ 2014 hodzie składzie 9.500 rubloŭ.

Pa stanie na 18 lipienia aficyjny kurs dalara ŭ Biełarusi, ustanoŭleny Nacbankam, składaje 8.860 rubloŭ.

Kamientary da artykuła