Bułhakaŭ ab prysudzie Navalnamu: «Łukašenka zaŭtra nie kiniecca pierajmać heta ŭ Pucina»
Redaktar časopisa ARCHE Valer Bułhakaŭ ab prysudzie Alaksieju Navalnamu.
«Naša Niva»: Ci adabjecca prysud Navalnamu niejak na situacyi ŭnutry Biełarusi? Ci stanie heta šturškom dla novych represij suprać apazicyi i niezaležnaha hramadstva?
Valeryj Bułhakaŭ:
Tyja dziejačy, ad jakich sychodzić niebiaśpieka biełaruskamu režymu, pavinny sabie zrabić vysnovy z taho, što stałasia. Ich pryvatnaja aktyŭnaść kantralujecca śpiecsłužbami, i niejkija ich ryzykoŭnyja inicyjatyvy mohuć stać padstavaj dla kryminalnaha pieraśledu.
Što tyčycca pazicyi biełaruskaj ułady, to, naadvarot, hety prysud jana moža vykarystać dla taho, kab padkreślić svaju ciapierašniuju pamiarkoŭnaść na fonie palityčnych noravaŭ uschodniaj susiedki.
Pasadžeńnie papularnaha apanienta ŭładaŭ u turmu pa ekanamičnym artykule ciažka nazvać niečym novym -- mnohija ŭschodniejeŭrapiejskija aŭtarytarnyja režymy praktykujuć heta. Łukašenka zaŭtra nie kiniecca pierajmać heta ŭ Pucina. Heta rabiłasia i raniej.Chutčej heta pakazvaje, što pabudavanyja ŭ «sajuznaj dziaržavie» palityčnyja sistemy dalokija ad kryzisu. Možna sadzić na doŭhi termin Navalnaha abo Statkieviča bieź niebiaśpieki maštabnych pratestaŭ. Na vialiki žal, karjera sapraŭdy apazicyjnaha palityka na hetym abšary nieparyŭna źviazana z kryminalnym pieraśledam i turmoj.
«NN»: Ci musiać biełarusy vykazvać svaju salidarnaść z Navalnym siońnia? Zdajecca, sam jon nikoli nie vykazvaŭsia ŭ padtrymku biełaruskich palitviaźniaŭ.
VB: Peŭny, što najlepšaj salidarnaściu z Navalnym byli b nie pietycyi i zvaroty, poŭnyja spačuvańniaŭ u jaho adras i praklonaŭ u bok Pucina, a hramadzianskija i palityčnyja inicyjatyvy, jakija b raźniavolvali hramadstva pierad abliččam niepieraborlivych u srodkach uładaŭ.
Pasadžeńnie Navalnaha ŭ turmu — heta pryvatny vypadak tatalnaj niesvabody našych hramadstvaŭ.
«NN»: Ci paŭpłyvaje hety prysud na dalejšyja adnosiny pamiž Rasijaj i Zachadam?
VB: Siońniašni prysud nie pastaviŭ apošniaj kropki ŭ spravie Navalnaha. Nas čakaje doŭhaja čarada apielacyj i sudovych batalij. Dumaju, sprava dojdzie da ahulnajeŭrapiejskich orhanaŭ justycyi.
Kali sprava sapraŭdy vysmaktana z palca, to prysud raniej ci paźniej budzie pierahledžany pad ciskam Zachadu. Kali ž nie, to, jak i ŭ vypadku z Chadarkoŭskim usio źviadziecca da rytualnaj rytoryki zakłapočnaści.