Da Mikałaja Aŭtuchoviča dachodziać nie ŭsie listy z voli
Da palitviaźnia Mikałaja Aŭtuchoviča ŭ Hrodnienskuju turmu №1 dachodziać nie ŭsie listy z voli.
Pra heta jon napisaŭ u svaim liście da białynickaha žurnalista Barysa Vyrviča, jaki toj atrymaŭ 24 lipienia.
Palitviazień piša, što, kali raniej jon atrymlivaŭ u miesiac u siarednim 90–95 listoŭ, to ŭ červieni da jaho dajšło tolki 40, choć jon viedaje, što peŭnyja ludzi listy jamu dasyłali.
Pa słovach Mikałaja Aŭtuchoviča, «tak adbyvajecca inšy raz. Mnie viadoma, u čym sprava, ale nie budu ab hetym pisać. Spadziajusia, napieradzie ŭsio iznoŭ budzie dobra».
Na dumku Barysa Vyrviča, prablemy ŭ dastaŭcy listoŭ da palitviaźniaŭ moža być niejkim čynam źviazana z akcyjaj salidarnaści «Tydzień palitviaźnia».
«Ja rehularna pierapisvajusia ź niekatorymi biełaruskimi palitviaźniami, tamu viedaju, što davoli časta listy da ich paprostu nie dachodziać, — kaža Barys Vyrvič. — Zvyčajna takija vypadki zdarajucca, kali pravodziacca niejkija kampanii salidarnaści, i viaźniam pačynajuć dasyłać šmat paštovak i listoŭ sa słovami padtrymki. Voś jakraz ź siaredziny červienia i pačała prachodzić kampanija salidarnaści „Tydzień palitviaźnia“.
Mahčyma, jość i niejkaja inšaja pryčyna, pra jakuju zhadvaje Mikałaj Aŭtuchovič. Viedaju dakładna tolki, što ŭ červieni ja asabista dasyłaŭ Mikałaju Aŭtuchoviču pryvatny list, jakoha jon nie atrymaŭ».