Vyjšaŭ treci zbornik Mikoły Kandratava

Treci paetyčny zbornik Mikoły Kandratava «Kropli daždžu» pabačyŭ śviet u sieryi «Kniharnia piśmieńnika» Biblijateki Sajuza biełaruskich piśmieńnikaŭ.

Kali ŭ anatacyi da knihi paznačajecca, što aŭtar praciahvaje «sumna-liryčnaje pieraasensavańnie śvietu», to z hetaj dumkaj nie chočacca pahadžacca. Bo vieršy Mikoły Kandratava — aŭtara, jaki napoŭnicu raskryŭ svoj talent užo ŭ dosyć stałym uzroście, naviedvajučy supołku «Litaraturnaje pradmieście», nasamreč pakidajuć uražańnie stanoŭčaje i soniečnaje. Jak i sam paet, tvorčaja maniera jakoha svajoj dalikatnaściu i čujnaściu da navakolnaha śvietu nahadvaje piśmo fiłałahičnaha pakaleńnia. Vieršy sučasnyja i adnačasova kłasičnyja. Jany — nibyta spadkajemcy tvoraŭ Maksima Bahdanoviča. Ekspresijanizm u XXI stahodździ? Mahčyma. I heta pryvablivaje.

***
Nad Vałožynam vobłaki biełyja-biełyja,
i miž ich, ahladajučy śviet,
zredku chramy i zamkaŭ ruiny ŭtraviełyja,
Stracim-lebiedziem sonca płyvie.

Pahladaje siudy, dzie pałacy lustrujucca
praz umoŭnuju rysu ściany.
Zalustreččam zdajecca ziamla biełaruskaja,
u jakim zabłudzilisia my.

Pryvablivaje čytača i tematyčnaja raznastajnaść — ad staražytnych vieravańniaŭ i fiłasofii da pryśviačeńniaŭ paplečnikam, kaleham i sučaśnikam Natalli Kučmiel, Uładzimiru Niaklajevu, Śviatłanie Dłatoŭskaj, Alesiu Kviatkoŭskamu, Aksanie Sprynčan i inšym. Paetyčnyja formy taksama roznyja — ad sanieta da vierlibra. Novaja kniha Mikoły Kandratava «Kropli daždžu» — prykład paśpiachovaha adnaŭleńnia kłasičnaj maniery ŭ našym časie.

Kamientary da artykuła