Departamient historyi EHU ŭznačalić litoŭski historyk Paškienie
Pa vynikach aktyŭnych mižnarodnych pošukaŭ było pryniataje rašeńnie, što Departamient historyi Jeŭrapiejskaha humanitarnaha ŭniviersiteta (Vilnia) uznačalić doktar humanitarnych navuk Vilenskaha ŭniviersiteta Juścina Paškienie, paviedamlaje pres-słužba ŭniviersiteta.
Da prychodu ŭ EHU d-r Paškienie była namieśnicaj dekana pa pytańniach navuki i daktarantury Histaryčnaha fakulteta Vilenskaha ŭniviersiteta.
U jaje pracoŭnyja abaviazki budzie ŭvachodzić kiravańnie akademičnymi prahramami EHU ŭ halinie kulturnaj spadčyny, a taksama novymi i ciapierašnimi daśledčymi inicyjatyvami.
Jana maje značny akademičny dośvied u halinie archieałohii i daśledavańniaŭ kulturnaj spadčyny, vopyt kiraŭničaj pracy i paśpiachovaj realizacyi mižnarodnych daśledčych prajektaŭ.
Ad 2003 hoda d-r Paškienie pracavała vykładčycaj kafiedry Teoryi historyi i historyi kultury i zajmała pasadu namieśnicy dekana Histaryčnaha fakulteta Vilenskaha ŭniviersiteta. Ad 2006 h. administruje i kiruje prajektami, jakija padtrymlivaje Jeŭrasajuz, nakiravanymi na pavyšeńnie jakaści prahram, zaznačaje pres-słužba EHU
D-r Paškienie – staršynia rady pa acency kulturnaj spadčyny pry Departamiencie kulturnaj spadčyny Ministerstva kultury Litvy. Śfiera navukovych zacikaŭleńniaŭ — archieałohija Siaredniaviečča i Novaha času, teoryja i praktyka archieałohii i kulturnaj spadčyny.
Raniej Departamient historyi EHU uznačalvaŭ Pavieł Cieraškovič,
u sakaviku 2013 h. jon byŭ zvolnieny z pasady kiraŭnika departamienta historyi EHU, ale zastaŭsia kiraŭnikom sienata, daśledčaha centru i vykładčykam univiersiteta.
Z kanca sakavika 2013 h. kiraŭnictva departamientam historyi da asobnaha rašeńnia kiraŭničaj rady ŭniviersiteta pryniaŭ na siabie prarektar pa akademičnych pytańniach prafiesar Alaksandr Kaŭbaska.
Jeŭrapiejski humanitarny ŭniviersitet byŭ zasnavany ŭ 1992 h. u Minsku. U 2004 h. byŭ začynieny ŭładami, praz hod adnaviŭ dziejnaść u Litvie, atrymaŭšy status litoŭskaha ŭniviersiteta.
Bakałaŭraŭ rychtujuć pa prahramach biełarusistyki, virtualnaha dyzajna i miedyja, kulturnaj spadčyny, miedyi i kamunikacyj. Jość mahistratura, PnD-prahrama.
Navučajecca kala 1600 čałaviek, u tym liku na vočnaj formie bakałaŭryjatu kala 500 čałaviek, zavočnaj - 900, mahistratury -- 200, daktarantury -- 6. Studenty vočnaj formy navučajucca i žyvuć u Vilni.