KDK vyjaviŭ zavyšeńnie abjomaŭ narychtavanych karmoŭ sielhasarhanizacyjami
Kamitet dziaržkantrolu vyjaviŭ prypiski padčas pravierki vierahodnaści abjomaŭ narychtavanych karmoŭ i ich jakaści.
Jak paviedamiła pres-słužba KDK, manitorynh pravodziŭsia pavodle daručeńnia kiraŭnika dziaržavy. Situacyja vyvučałasia ŭ adnym rajonie kožnaj vobłaści, pry hetym dla bolšaj vierahodnaści źviestak u bolšaści ź ich manitorynham byli achopleny nie mienš jak pałova haspadarak.
Pravodziŭsia taksama poŭny analiz jakaści narychtavanaha sienažu, vyniki jakoha raniej nie ŭličvalisia pry składańni apieratyŭnaj i statystyčnaj spravazdačnaści, dzie źviestki pra abjomy narychtavanaha kormu raźličvajucca pa ŭsiarednienych daviedačnych kaeficyjentach. Dla hetaha ŭ pravieranych haspadarkach byli ŭziaty proby sienažu dla vyznačeńnia łabaratornym mietadam ich jakasnych pakazčykaŭ i adniasieńnia da adpaviednych vidaŭ i kłasaŭ jakaści karmoŭ.
Vyniki łabaratornaha daśledavańnia pakazali, što praktyčna va ŭsich pravieranych rajonach faktyčnaje sumarnaje ŭtrymańnie ŭ sienažy karmavych adzinak nižejšaje za padadzienyja ŭ statystyki źviestak na 10–16%.
Da prykładu, u filijale «Łobčanskaje» AAT «Łuniniecki małočny zavod» zhadanaje zavyšeńnie skłała 44%, u SFH «Siarhiejevičy» Puchavickaha rajona — 36%, u AAT «Ahrakambinat «Babrujski» — 26%.
KDK ustanaviŭ, što va ŭsich pravieranych rajonach značnaja častka narychtavanaha sienažu padlahaje pieravodu ŭ inšyja, mienš kaštoŭnyja pa pažyŭnaści, vidy karmoŭ. Naprykład, u Puchavickim rajonie z 54 tys. ton daśledavanaha sienažu patrabavańniam narmatyvaŭ adpaviadajuć tolki 22%. Astatni korm nieabchodna pieravodzić u siłas (47%) i siłaž (31%).
Padčas manitorynhu vierahodnaści źviestak dziaržaŭnaj statystyčnaj spravazdačnaści ŭstanoŭleny fakty prypisak fizičnych abjomaŭ narychtavanych karmoŭ.
Naprykład, u Krasnapolskim rajonie bolš jak na 3 tys. ton (na 62% ad spravazdačnaj ličby) zavyšany abjomy siena, 6,7 tys. ton (23%) — sienažu, 4 tys. ton (36%) — sałomy, 80 ton (40%) — bulby na karmavyja mety. Fakty prypisak u statspravazdačnaści ŭstanoŭleny ŭ asobnych arhanizacyjach kožnaha z pravieranych rajonaŭ (tak, u Loźnienskim rajonie ŭ 50% pravieranych haspadarak).
«Zhadanyja źviestki łabaratornych daśledavańniaŭ i ŭstanoŭlenyja fakty prypisak mohuć śviedčyć pra toje, što ŭ cełym pa respublicy adlustravany ŭ statspravazdačnaści abjom narychtavanaha sienažu nižejšy za faktyčny. Aprača taho, niemałaja jaho častka pa pažyŭnaści adpaviadaje mienš kaštoŭnym karmam — travianomu siłasu i siłažu», — zaznačyła pres-słužba. Na dumku kantraloraŭ, u asnoŭnym hetaja situacyja abumoŭlena tym, što ŭ bolšaści pravieranych sielhasarhanizacyj parušalisia patrabavańni halinovaha rehłamientu pa narychtoŭcy sienažu (pieravyšeńnie terminaŭ zakładki, nievykanańnie patrabavańniaŭ da vilhotnaści sienažnaj masy i inšyja).
Ustanoŭlena taksama, što praktyčna va ŭsich rehijonach nie nadajecca naležnaj uvahi zabieśpiačeńniu zachavanaści karmoŭ — u bolšaj častki pravieranych sielhasarhanizacyj jany nie byli aharodžany. Na častcy ź ich paškodžana plonačnaje ŭkryćcie, u vyniku byli vyjaŭleny ačahi psavańnia karmoŭ. Łabaratorny analiz karmoŭ z razhiermietyzavanych tranšej pakazaŭ najhoršy vynik pa pravieranych haspadarkach.