Uznaharodžańnie najlepšych pierakładčykaŭ na biełaruskuju — 30 vieraśnia
Uručeńnie premii časopisa «PrajdziŚviet» za najlepšy mastacki pierakład na biełaruskuju projdzie ŭ kniharni «łohvinaŬ» 30 vieraśnia, u Suśvietny dzień pierakładčyka.
Pierakładčyki buduć uhanaravanyja ŭ troch naminacyjach: «Proza», «Paezija» i «Pierakład u časopisie «PrajdziŚviet».
Z karotkaha śpisu pretendentaŭ, abranych redakcyjaj časopisa, žury vyznačyła imiony najlepšych pierakładčykaŭ, čyje tvory źjaŭlalisia asobnymi knihami i časopisnymi publikacyjami ŭ 2013 hodzie.
Najbolšaja kolkaść pretendentaŭ była pradstaŭlenaja prazaičnymi tvorami: 8 ramanaŭ i zbornikaŭ apaviadańniaŭ ź piaci movaŭ.
Z najlepšych paetyčnych pierakładaŭ knihaj pradstaŭlenaja tolki adna, astatnija byli nadrukavanyja ŭ šerahu litaraturnych časopisaŭ. Zatoje siarod movaŭ paetyčnych padborak takija nie nadta papularnyja ŭ Biełarusi, jak kitajskaja, łacinskaja i starahreckaja.
U naminacyju «Pierakład u časopisie «PrajdziŚviet» trapili 4 aŭtary, čyje tvory byli nadrukavanyja ŭ 9-m i 10-m numarach vydańnia.
Płanujecca, što ŭ viečarynie voźmuć udzieł jak naminanty na premiju, tak i siabry žury.
Pačatak a 19-j.
Adras kniharni «łohvinaŬ»: pr-t Niezaležnaści, 37A.
Śpis naminantaŭ na premiju časopisa «PrajdziŚviet»:
I. Proza:
Śviatłana Bohuš: «Rozum» Rudolfa Słobady (pier. sa słavackaj, vyd. Z. Kołas);
Aleh Žłutka: «Anarchy in UKR» Siarhija Žadana (pier. z ukrainskaj, vyd. Łohvinaŭ);
Źmicier Kołas: «Mahčymaść vyspy» Mišela Ŭelbeka (pier. z francuzskaj, vyd. Z. Kołas);
Maryja Puškina: «Na šlachu ŭ Babadah» Andžeja Stasiuka (pier. z polskaj, vyd. Z. Kołas);
Pavieł Raaho: «Kaliści ŭ Bracisłavie: Majo žyćcio z Oskaram Ł." Žo Łanhieravaj (pier. sa słavackaj, vyd. Z. Kołas);
Andrej Chadanovič: «Jevanhielle pavodle Piłata» Eryka-Emaniuela Šmita (pier. z francuzskaj, vyd. Z. Kołas)
Maryna Šoda: «Kajtuś-čaradziej» Januša Korčaka (pier. z polskaj, vyd. Łohvinaŭ);
Siarhiej Šupa: «Inšała, Madona, inšała» Milenki Jerhaviča (pier. z baśnijskaj, vyd. Z. Kołas).
II. Paezija:
Lavon Barščeŭski: «Miedeja» Eŭrypida (pier. sa starahreckaj, «Dziejasłoŭ» № 57);
Volha Hapiejeva: «Pryciemki nad haroj Tajšań: Sučasnaja kitajskaja paezija» (pier. z kitajskaj, «Dziejasłoŭ», № 56);
Aksana Danilčyk: «Pakul ty śpiš» Antonii Poccy (pier. ź italjanskaj, «Vierasień», № 6);
Maryna Kazłoŭskaja: «Biez» Tadevuša Ruževiča (pier. z polskaj, vyd. Z. Kołas);
Žanna Niekraševič-Karotkaja: «Radzivilijada» Jana Radvana (pier. z łacinskaj, «Maładość», № № 1–12 / 2011, № № 1–8 / 2012).
III. «PrajdziŚviet»:
Pavieł Donaŭ: «Žałoba markiza Marna» Hiłbierta Kita Čestertana (pier. z anhielskaj, № 9);
Alaksiej Žbanaŭ: «Mademuazel de Skiudery» Ernsta Teadora Amadeja Hofmana (pier. ź niamieckaj, № 9);
Maryna Kažarnovič: «Kazki dla niepasłuchmianych dziaciej i ich kłapatlivych baćkoŭ» Dušana Tarahieła (pier. sa słavackaj, № 10);
Śviatłana Rohač: «Karotkija kazki dla stomlenych baćkoŭ» Michała Viveha (pier. z češskaj, № 10).