Viaskovaja trahiedyja ŭ Vałožynskim rajonie: palaŭničy zastreliŭ žonku, a potym zastreliŭsia sam
Vypadak adbyŭsia 19 kastryčnika (subota) ŭ vioscy Vajhany kala 17:30.
U dziažurnuju častku Vałožynskaha RAUS patelefanavaŭ žychar Vajhanoŭ i skazaŭ, što ŭ susiednim dvary čujucca streły.
Jak raspaviała staršy śledčy Vałožynskaha rajadździeła Śledčaha kamiteta Julija Sielatyckaja, uviečary viaskoŭcy nie siadzieli doma, a zavichalisia kala chataŭ.
Adzin mužčyna ŭbačyŭ, što susiedka z doma nasuprać z krykami pierabiahaje darohu, a ŭ hety čas jaje muž z palaŭničaj strelby stralaje joj u śpinu.
«Hety streł byŭ nie pieršym. Žančyna paśpieła tolki dabiehčy da mašyny, što stajała na vulicy, i pavaliłasia miortvaja. Jaje muž viarnuŭsia ŭ dom, prystaviŭ strelbu da padbarodździa i streliŭ».
Pa spravie byli apytanyja 11 čałaviek.
U hety dzień mužčynu nichto nie bačyŭ, ale ludzi adznačali, što apošnim časam jon staŭ vypivać. «Mahčyma, heta i stała pryčynaj trahiedyi», — skazała staršy śledčy.
Pavodle jaje słoŭ, mužčyna 1960 hoda naradžeńnia byŭ palaŭničym: «A ŭsio palaŭničyja znachodziacca pad kantrolem, prachodziać adpaviednyja abśledavańni i pravierki,
da jaho nikoli nie ŭźnikała nijakich zaŭvah».
Julija Sielatyckaja dadała, što kryminalnaja sprava zavodzicca nie budzie, bo čałaviek, jaki ździejśniŭ złačynstva, pamior. Vina inšych asob, jakija majuć dačynieńnie da jaho śmierci, nie ŭstanoŭlena.
«Siamja stanoŭča charaktaryzavałasia pa miescy pracy i pa miescy žycharstva. Ich darosłaja dačka ź siamjoj žyvie ŭ Minsku», — skazała Ju. Sielatyckaja.