Kiraŭnictva BAŽ sustrełasia z načalnikam staličnaj milicyi
23 kastryčnika staršynia HA «BAŽ» Žanna Litvina i jaje namieśnik Andrej Bastuniec sustrelisia z načalnikam HUUS Minharvykankama Alaksandram Barsukovym.
Temaj hutarki stała masavaje zatrymańnie žurnalistaŭ 19 kastryčnika na čyhunačnym vakzale ŭ Minsku, paviedamlaje sajt HA «BAŽ».
– Sustreča z Alaksandram Barsukovym ciahnułasia bolš za paŭhadziny. Kiraŭnik staličnaj milicyi vysłuchaŭ usie našy arhumienty i našu zaniepakojenaść advolnymi zatrymańniami žurnalistaŭ, – kaža Žanna Litvina. – My jašče raz nahadali, što nie tolki ŭ supracoŭnikaŭ milicyi, ale i ŭ žurnalistaŭ jość svaje prafiesijnyja pravy i abaviazki, jakija zaklučajucca ŭ tym, kab znachodzicca niepasredna na miescy padziejaŭ i fiksavać, zdymać, zanatoŭvać usio, što adbyvajecca.
U svaju čarhu, Alaksandr Barsukoŭ adznačyŭ, što ŭ subotu jon nie znachodziŭsia na miescy kanfliktu, ale adrazu ž prybyŭ tudy, bo pres-sakratar HUUS Minharvykankama Alaksandr Łastoŭski byŭ u adpačynku.
Alaksandr Barsukoŭ padkreśliŭ, što asabista pravieryŭ dakumienty ŭ žurnalistaŭ, paśla čaho daŭ padnačalenym kamandu vyzvalić usich pradstaŭnikoŭ ŚMI.
– Akramia subotniaha vypadku, – praciahvaje Žanna Litvina, – my abmierkavali ahulny stan uzajemadačynieńniaŭ milicyi z presaj.
Kiraŭniki arhanizacyi raspaviali sp-ru Barsukovu pra dadzienyja manitorynhu, pavodle jakoha za hety hod było jak minimum 35 vypadkaŭ zatrymańnia žurnalistaŭ. Čatyry ź ich skončylisia administratyŭnymi aryštami.
Barsukoŭ miarkuje, što dačynieńni milicyi i žurnalistaŭ u krainie apošnim časam dastatkova narmalnyja, chacia i kožny z bakoŭ moža mieć da druhoha peŭnyja pretenzii.
Žanna Litvina pryviała prykład naładžvańnia ŭzajemadačynieńniaŭ milicyi i žurnalistaŭ u susiednich krainach. U pryvatnaści, raspaviała pra ŭviadzieńnie ŭ Maskvie tak zvanych «kartak biaśpieki» žurnalistaŭ, jakija vydajuć orhany ŭnutranych spraŭ pavodle miemarandumu, što zaklučyli maskoŭskaja palicyja i Rasijski sajuz žurnalistaŭ.
Lidary BAŽ prapanavali abmierkavać usie hetyja pytańni bolš padrabiazna na admysłovaj sustrečy žurnalistaŭ i milicyi. Apošniaja prapanova nie vyklikała ŭ kiraŭnika HUUS zhody.
Pa jaho słovach, jon i tak hatovy adkazvać na lubyja pytańni žurnalistaŭ padčas pres-kanfierencyj ci sustrakacca ź imi padčas ułasnych pryjomnych hadzinaŭ.
Tym nie mienš, sp. Barsukoŭ paabiacaŭ vyvučyć dośvied bližejšych susiedziaŭ i pravieryć infarmacyju pa tych kanfliktnych situacyjach, pra jakija raspaviali pradstaŭniki žurnałsckaj arhanizacyi.