Rasijski biźniesmien Jeŭtušenkaŭ admoviŭsia ad kupli doli va «Urałkalii»
Rasijski biźniesmien, asnoŭny akcyjanier AFK «Sistema» Uładzimir Jeŭtušenkaŭ admoviŭsia ad kupli doli va «Urałkalii» z-za zavyšanaj cany, paviedamlaje infarmacyjnaje ahienctva «Prajm».
Jeŭtušenkaŭ ličyć spraviadlivaj ciapierašniuju rynačnuju canu biez zapatrabavanaj pradaŭcami premii. «Admoviŭsia <…> Hatovy płacić canu na ekranie (biržavoha terminała. — Prajm.), biez premii», — skazaŭ Jeŭtušenkaŭ u aŭtorak žurnalistam.
Adkazvajučy na pytańnie ab patencyjalnych partniorach pa ździełcy, jon paviedamiŭ: «Razhladaŭ pakupku i z Huceryjevym, i z Aščadbankam».
Pavodle infarmacyi «Prajm» ad 23 kastryčnika, kiraŭnik Aščadbanka Hierman Href paviedamiŭ žurnalistam, što jaho bankam nie viaducca pieramovy ab finansavańni vykupu doli va «Urałkalii».
«Nie. Nakolki ja viedaju, nie viaducca. Kali b vialisia, to ja b nie skazaŭ», — adznačyŭ jon, patłumačyŭšy, što takija źviestki mohuć być raskrytyja tolki pry žadańni klijenta.
Razmovy ab tym, što saŭładalnik «Urałkalija» Sulejman Kierymaŭ źbirajecca pradać svaje 21,75% akcyj u kampanii, iduć z tych por, jak Śledčy kamitet Biełarusi pradjaviŭ jamu abvinavačańni. 8 vieraśnia źjaviłasia infarmacyja ab mahčymym prodažy pakieta Kierymava va «Urałkalii» bankiru Uładzimiru Kohanu.
9 vieraśnia hetu infarmacyju abvierh aficyjny pradstaŭnik finansava-pramysłovaj hrupy «Nafta Maskva» Anton Avieryn. 25 vieraśnia stała viadoma, što kitajski suvierenny fond Chengdong Investment Corporation (CIC) u vyniku kanviertacyi ablihacyj u zvyčajnyja akcyi nabyŭ 12,5% akcyjaniernaha kapitału «Urałkalija».
U hety ž dzień źjaviłasia infarmacyja, što hrupa «Oneksim» miljardera Michaiła Procharava razhladaje mahčymaść kupli doli Kierymava ŭ AAT «Urałkalij».
28 vieraśnia Alaksandr Łukašenka zajaviŭ, što patencyjalnyja pakupniki doli va «Urałkalii» žadajuć supracoŭničać z «Biełaruśkalijem». «Toj, chto choča kupić hety aktyŭ («Urałkalij»), daje nam sihnał da taho, što, biełarusy, pačakajcie krychu, my ŭsio roŭna budziem razam», — skazaŭ Łukašenka.
«Tolki idyjot moža pracavać sabie na škodu. Tamu što naša abjadnańnie z Rasijaj uzdymie ceny na kalijnyja ŭhnajeńni. Raźjadnańnie abaviazkova vyklikaje padzieńnie cen», — dadaŭ jon.
21 kastryčnika na sustrečy z kiraŭnikami niekatorych ŚMI krain SND na pytańnie, ci sustrakaŭsia jon z patencyjalnymi pretendentami na kantrolny pakiet akcyj «Urałkalija» Michiłam Procharavym, Uładzimiram Kohanam i Michaiłam Huceryjevym, Alaksandr Łukašenka adkazaŭ: «Nie. Ja Procharava, Kohana naohuł nie viedaju, navat nie ŭjaŭlaju, čym jany zajmajucca. Viedaju Huceryjeva, ale my ź im prablemu kupli nie abmiarkoŭvali. U ahulnych rysach».
U pryvatnaści, paviedamiŭ Łukašenka, na jaho pytańnie, čamu Huceryjeŭ nie choča nabyć kantrolny pakiet akcyj «Urałkalija», toj adkazaŭ, što padumaje. «Potym čuju, što jon nibyta ŭdzielničaje. Pry sustrečy, kaniešnie, ja zadam jamu pytańnie», — skazaŭ biełaruski kiraŭnik.