U Šviecyi razhladajuć apielacyju Volhi Kłaskoŭskaj
23 kastryčnika ŭ Stakholmie sud pačaŭ razhladać apelacyju ŭ spravie biełaruski Volhi Kłaskoŭskaj, abvinavačanaj u zamachu na zabojstva muža — švedzkaha hramadzianina tureckaha pachodžańnia Hiokaja Bezhina.
Pasiedžańni buduć doŭžycca 3 dni. Miarkujecca, što kančatkovy verdykt abvieściać u piatnicu, 25 kastryčnika, paviedamlaje radyjo «Svaboda».
Hramadzianku Biełarusi Volhu Kłaskoŭskuju zatrymali ŭ Švecyi 30 sakavika. Sud, jaki adbyŭsia 23 žniŭnia, prysudziŭ Volzie vosiem hadoŭ turmy. Taksama jana pavinna vypłacić byłomu mužu kampensacyju ŭ 110 tysiač švedzkich kron.
Volha Kłaskoŭskaja padała kasacyjnuju skarhu, jakaja razhladajecca hetymi dniami. Pakolki ŭ Švecyi dahetul niama biełaruskaha dyplamatyčnaha pradstaŭnika, spravami biełaruskich hramadzianaŭ apiakujecca biełaruskaja ambasada ŭ Łatvii.
Voś što apavioŭ Radyjo Svaboda Andrej Kožan, daradca — zahadčyk konsulskaha adździełu ambasady Biełarusi ŭ Łatvii: «My znachodzimsia ŭ stałym kantakcie i z samoj Volhaj, i z aficyjnymi ŭładami Švecyi.
Jość i zvarotnaja reakcyja ź ich boku. Trymajecca Volha davoli ŭpeŭniena z ulikam jaje sytuacyi, nie zusim prostaj.
Sud budzie iści ciaham troch dzion, ale niejkija perspektyvy prahnazavać ja, kaniečnie ž, nie vaźmusia. Heta apelacyjny sud, sud apošniaj instancyi, jaki pavinien vyrašyć, ci zastaniecca ŭ sile prysud, jaki ŭžo vyniesieny — 8 hadoŭ, albo budzie prysud na karyść Volhi».
Pierad samym sudovym pasiedžańniem biełaruski dyplamat razmaŭlaŭ z samoj Volhaj. Andrej Kožan učora patelefanavaŭ i maci Volhi Kłaskoŭskaj. Maci Volhi Ludmiła Kłaskoŭskaja raspaviała: «Pasiedžańni buduć siońnia, zaŭtra i paślazaŭtra. U jaje budzie novy advakat — Tomas Nilsan. Jana mnie ŭčora list dasłała.
Trymajecca jana narmalna, napisała, što znachodzicca ŭ takim tryvožna-ŭschvalavanym stanie, ale pobač novy advakat, ź jakim vielmi dobryja kantakty ŭstalavalisia, razmovy, spatkańni. Paabiacała trymacca ŭpeŭniena, biez emocyjaŭ na sudovym pasiedžańni.
Volha papiaredziła, što, napeŭna, nia zmoža telefanavać, pakolki budzie na pasiedžańniach prysutničać».
Maci Volhi Kłaskoŭskaj spadarynia Ludmiła źviarnułasia ź listom da karalevy Švecyi Silvii, prosiačy dapamahčy Volzie.
Časovy pavierany ŭ spravach Švecyi ŭ Biełarusi Marcin Oberh paviedamiŭ spadaryni Ludmile, što list karalevie pieradali. Taksama Ludmiła Kłaskoŭskaja raspaviała, što małodšy syn Volhi Adam zastajecca ŭ Švecyi z baćkam Hiokajem Bezhinam.
Sama Ludmiła źviartałasia da švedzkich uładaŭ, kab joj dazvolili sustrecca z unukam, ale atrymała admovu.
Ale ŭ jaje jość nadzieja, što chłopčyka viarnuć maci, bo Volha atrymała aptymistyčny adkaz ad aŭtarytetnaha mižnarodnaha kamitetu:«Heta skandynaŭski kamitet, jaki zajmajecca prablemami zachavańnia siamji i dziacinstva, u skład jakoha ŭvachodziać jurysty, prafesary prava, filazofii, sudździ ŭ adstaŭcy, advakaty, jakija pisali dakład u Radu Eŭropy pra vyniki niezakonnaha adbirańnia dziaciej u baćkoŭ u Švecyi.
I jany joj adkazali, što zojmucca spravaj małodšaha syna Volhi Adama i buduć rabić usio, kab jaho viarnuli joj. I heta dobraja navina».
Kančatkovy verdykt pa spravie Volhi Kłaskoŭskaj budzie vyniesieny 25 kastryčnika.