Pjany kiroŭca apraŭdany za najezd na 6-hadovaha chłopčyka
Ale inšaha suda nie paźbiehnie.
6-hadovy Dzima atrymaŭ ciažkija traŭmy. Fota tut.by.
28-hadovy minčuk 3 žniŭnia na siabroŭskim Jeep Grand Cherokee u rajonie staličnaj vulicy Pažarskaha źbiŭ 6-hadovaha chłopčyka, jakija vybieh na prajeznuju častku. Chłopčyk zastaŭsia žyvym, ale byŭ špitalizavany.
«Zhodna z zaklučeńniem sudova-aŭtatechničnaj ekśpiertyzy, kiroŭca «nie mieŭ techničnaj mahčymaści praduchilić najezd na piešachoda šlacham prymianieńnia mier ekstrannaha tarmažeńnia». Kryminalny pieraśled kiroŭcy pa padazreńni ŭ parušeńni PDR, što paciahnuła pa nieaściarožnaści naniasieńnie ciažkaha cialesnaha paškodžańnia, spynieny»,
— paviedamiŭ pradstaŭnik upraŭleńnia Śledčaha kamiteta pa Minsku Alaksandr Hierasimaŭ.
Miedycynski ahlad vyjaviŭ, što kiroŭca ŭ momant najezdu byŭ napadpitku. Pry sabie ŭ jaho adsutničali pravy i dakumienty na aŭto. Hetyja parušeńni nie paŭpłyvali na ździejśnieny najezd, ale adkazvać za ich daviadziecca.
«Materyjały pa nazvanych pravaparušeńniach nakiravanyja ŭ padraździaleńnie Dziaržaŭtainśpiekcyi dla pryciahnieńnia kiroŭcy da administracyjnaj adkaznaści», — skazaŭ Hierasimaŭ.
Ale na kiroŭcu zaviali novuju kryminalnuju spravu — za ŭhon Jeep Grand Cherokee. Zajavu napisaŭ uładalnik aŭto: jon paviedamiŭ, što siabar sieŭ za rul jaho mašyny biez dazvołu. Ciapier spravu rychtujuć da pieradačy ŭ sud.
Abvinavačany znachodzicca pad vartaj.