ES, ZŠA, Ukraina i Biełaruś — lidary pa kolkaści handlovych barjeraŭ dla rasijskich tavaraŭ
Biełaruś uvachodzić u čaćviorku lidaraŭ pa kolkaści handlovych abmiežavańniaŭ u dačynieńni da rasijskich tavaraŭ.
Da takoj vysnovy pryjšli aŭtary manitorynhu «Ab vynikach sacyjalna-ekanamičnaha raźvićcia Rasijskaj Fiederacyi ŭ studzieni—vieraśni 2013 hoda», apublikavanaha na sajcie Minekanamraźvićcia Rasii 30 kastryčnika, paviedamlaje BiełaPAN.
Pavodle źviestak Minekanamraźvićcia, maksimalnaja kolkaść abmiežavalnych mier u dačynieńni da rasijskich tavaraŭ dziejničaje taksama ŭ ES, va Ukrainie i ŭ ZŠA.
U dakumiencie asobna vyłučajecca situacyja z dostupam rasijskich vytvorcaŭ da dziaržaŭnych zakupak u Biełarusi.
Jak padkreślivajecca, niahledziačy na toje što z 1 studzienia 2013 hoda ŭ Biełarusi ŭ miežach dziaržaŭnych zakupak dajecca nacyjanalny režym, biełaruski bok robić zachady pa abmiežavańni dostupu rasijskich vytvorcaŭ da takich zakupak.
«Tak, u pieršym kvartale 2013 hoda byŭ vyjaŭleny šerah administracyjnych barjeraŭ, jakija nie dazvalajuć rasijskim vytvorcam udzielničać u dziaržaŭnych zakupkach, što ŭ pryvatnaści zakranuła abmiežavańni prodažu zamiežnych kandytarskich vyrabaŭ i kansiervaŭ», — adznačajuć aŭtary manitorynhu, dadajučy, što ŭ vyniku ŭsio ž atrymałasia źniać abmiežavańni dostupu rasijskich kandytarskich vyrabaŭ na biełaruski rynak.
Poŭny pieralik abmiežavańniaŭ u dostupie rasijskich tavaraŭ na biełaruski rynak Minekanamraźvićcia RF publikujecca štomiesiac.
Zhodna sa źviestkami na 1 kastryčnika 2013 hoda, u Biełarusi isnujuć 12 takich barjeraŭ.
Siarod ich: užo zhadanyja miery pa abmiežavańni ŭdziełu rasijskich pastaŭščykoŭ u pracedurach dziaržaŭnych zakupak; uvoz u Biełaruś tytuniu, tytuniovych vyrabaŭ, ałkaholu, praduktaŭ pierapracoŭki ryby vyklučna praź śpiecimparcioraŭ, vyznačanych kiraŭnikom dziaržavy; abaviazkovaja markiroŭka kantrolnymi znakami šyrokaha pieraliku tavaraŭ; abmiežavańnie dostupu lekavych srodkaŭ i vyrabaŭ miedycynskaha pryznačeńnia; štohadovyja prahramy impartazamiaščeńnia; rehulavańnie cen na sacyjalna značnyja tavary (raboty, pasłuhi) i šerah inšych.
Nahadajem, prezident RF Uładzimir Pucin na pres-kanfierencyi viečaram 24 kastryčnika ŭ Minsku pavodle vynikaŭ pasiadžeńnia Vyšejšaha jeŭrazijskaha ekanamičnaha savieta zajaviŭ, što Rasija zhodnaja na pastupovaje ŭstaranieńnie ŭsich vyklučeńniaŭ z režymu handlu Mytnaha sajuza, ale tolki na ŭzajemnaj asnovie.
«My razumiejem, što dla našych partnioraŭ važna ŭstaranić voś hetyja vyklučeńni, źviazanyja z naftapraduktami i naftaj i hetak dalej. My hatovy. Dla nas heta straty biudžetu, ale my hatovy heta zrabić.
Raźličvajem na toje, što i partniory pojduć nam nasustrač, prybirajučy tyja vyklučeńni, jakija dla ich, jak jany ličać, važnyja», — zajaviŭ Pucin.