Daškievič: ES niešta nabłytaŭ, uklučyŭšy A.Łapatku ŭ «čorny śpis»
Pavodle ŭdakładnienych źviestak, u abnoŭleny śpis biełaruskich čynoŭnikaŭ, jakija traplajuć pad sankcyi ES, uniesieny try čałavieki, a nie dva, jak paviedamlałasia raniej.
Akramia načalnika Babrujskaj papraŭčaj kałonii № 2 (tam adbyvaje pakarańnie asudžany pravaabaronca Aleś Bialacki) Alaksandra Kakunina i jaho namieśnika Juryja Trutko, u śpis uklučany Alaksandr Łapatka, jaki na sajcie Aficyjnaha časopisa ES značycca jak namieśnik načalnika Mazyrskaj papraŭčaj kałonii № 9 (raniej u ŚMI Łapatka fihuravaŭ jak namieśnik načalnika Horackaj kałonii № 9, dzie ŭtrymlivaŭsia palitviazień Źmicier Daškievič, lidar «Maładoha frontu»).
Jak tłumačyć ES, Łapatka ŭklučany ŭ śpis čynoŭnikaŭ, jakija trapili pad sankcyi, za «niehumannaje abychodžańnie ź Dźmitryjem Daškievičam, u tym liku za prymianieńnie katavańniaŭ i admovu ŭ dostupie da advakata». «Łapatka vykarystoŭvaŭ pahrozy fizičnaha i seksualnaha nasilla dla taho, kab prymusić źniavolenaha padpisać prašeńnie ab pamiłavańni», — havorycca ŭ paviedamleńni, paviedamlaje BiełaPAN.
Sam Źmicier Daškievič miarkuje, što Łapatku ŭnieśli ŭ «čorny śpis» prosta pa inercyi.
U intervju Jeŭraradyjo Daškievič skazaŭ:
«Jon, u pryncypie, pakidaje ŭražańnie adnaho z najbolš adekvatnych ludziej i ŭ Horackaj kałonii, i va ŭsioj inšaj sistemie Biełarusi.
Jon pa adukacyi, što cikava, nastaŭnik biełaruskaj movy i litaratury. Asnoŭnyja represii, kali ja byŭ u Horackaj kałonii, ździajśniaŭ kiraŭnik apieratyŭnaha adździeła Pietrakovič. Jon rasstaŭlaŭ błatnych, i hetyja błatnyja vykonvali ŭsio, što jon skaža — vykonvali roznyja represii, źbivali ludziej, učyniali razborki «pa paniaćciach» i hetak dalej».
Pa słovach Daškieviča, Łapatka byŭ namieśnikam kiraŭnika Horackaj kałonii, kali ŭ papiaredni «čorny śpis» ES unieśli tahačasnaha kiraŭnika Kavalova. Potym Kavaloŭ pakinuŭ svaju pasadu, a Łapatka zaniaŭ miesca kiraŭnika kałonii. Vierahodna, kaža były palitviazień, Łapatku ŭnieśli ŭ śpis pa inercyi — na miesca Kavalova.