Nacbank zapłanavaŭ udvaja źnizić staŭku refinansavańnia da kanca 2014 h.
U kancy 2014 hoda staŭka refinansavańnia budzie składać 11-13%. Heta praduhledžana prajektam Asnoŭnych kirunkaŭ hrašova-kredytnaj palityki, raspracoŭščykam jakoha vystupaje Nacbank Biełarusi.
Miarkujecca, zhodna z prajektam, što hałoŭnaja meta hrašova-kredytnaj palityki ŭ nastupnym hodzie budzie zaklučacca ŭ źnižeńni inflacyi da 11%. Pry hetym čakajecca, što staŭka refinansavańnia ŭ siarednim za hod składzie 14-16% hadavych, a da kanca hoda źnizicca da 11-13%.
Zhodna z prahnozam, staŭka refinansavańnia ŭ nastupnym hodzie budzie źjaŭlacca asnoŭnym instrumientam rehulavańnia ŭzroŭniu pracentnych stavak na finansavym rynku.
Aprača taho, miarkujecca, što ŭ nastupnym hodzie adbudziecca nabližeńnie pracentnaj staŭki adnadzionnaha rublovaha mižbankaŭskaha kredytu da ŭzroŭniu staŭki refinansavańnia.
Varta zaznačyć, što zaraz staŭka refinansavańnia nie adlustroŭvaje koštu hrošaj u biełaruskaj ekanomicy.
Tak, hetaj vosieńniu staŭka pa adnadzionnym mižbankaŭskim kredycie była prykładna ŭdvaja vyšejšaj za staŭku refinansavańnia.
Jak paviedamlałasia raniej, biełaruskija ŭłady płanavali źnizić staŭku refinansavańnia da kanca 2013 hoda da 13-15% (z 30% u pačatku hoda). Da siaredziny červienia Nacbanku ŭdałosia źnizić ulikovuju staŭku da 23,5%. Adnak letam na fonie rostu kursu dołara pačaŭsia adtok rublovych układaŭ nasielnictva, paśla čaho biełaruski centrabank pryniaŭ rašeńnie spynić źnižeńnie ŭlikovaj staŭki.