Znojdzieny padazravany ŭ zabojstvie rodanačalnika aŭtabiznesu ŭ Biełarusi
Abvinavačvańnie ŭ zabojstvie biznesoŭca Siarhieja Klemantoviča i jaho spadarožnicy Volhi Skarednaj vystaŭlena deputatu abchazskaha parłamienta Nodziku Kvicynii.
Abchazskaje ahienctva «Apsnypres» sa spasyłkaj na abchazskuju prakuraturu paviedamlaje, što deputatu vystaŭlenyja abvinavačvańni pa niekalkich artykułach, siarod jakich «Ździajśnieńnie ŭ składzie arhanizavanaj hrupy vykradańnia dźviuch asob», «Naŭmysnaje zabojstva dźviuch asob» i «Niezakonnaje nabyćcio, zachoŭvańnie i našeńnie ahniastrelnaj zbroi».
U paniadziełak 18 listapada Kvicyniju dapytali, a ŭ aŭtorak 19 listapada, paśla taho jak parłamient pazbaviŭ deputata niedatykalnaści, u jaho domie byŭ praviedzieny pieratrus.
Siarhiej Klemantovič i jahonaja spadarožnica źnikli ŭ vieraśni 2012 hoda na adnoj z tras u Abchazii. U kastryčniku 2013 hoda ŭ zakinutym kałodziežy adnaho ź siołaŭ byli vyjaŭleny ich cieły.
Siarhiej Klemantovič mieŭ rasijskaje hramadzianstva i ŭznačalvaŭ kampaniju «El Pietroleum — Abchazija», jakaja zajmałasia narychtoŭkaj i apracoŭkaj mietałałomu, a taksama narychtoŭkaj ščebieniu. Pačynaŭ ža biznesoviec svoj biznes u Biełarusi, dzie ličycca adnym z zasnavalnikaŭ aŭtabiznesu.
Klemantovič pačynaŭ z reekspartu «Žyhuloŭ» pa schiemach Barysa Bierazoŭskaha, pastaŭlajučy ich ź Vienhryi na biełaruski, rasijski i kazachstanski rynak. U 1990-ja hady biznesoviec vioŭ bujny biznes na paliŭnym rynku SND, handlavaŭ mietałami, sielskahaspadarčaj i hruzavoj technikaj, budmateryjałami i zajmaŭsia ŭzajemazalikami.
U biznesmena było šmat vysokapastaŭlenych siabroŭ siarod biełaruskich i rasijskich čynoŭnikaŭ, jon uvachodziŭ u radu Mižnarodnaha sajuza desantnikaŭ.
U 2001 hodzie jaho kampanija «El Pietroleum» vykupiła va ŭrada Litvy z dyskontam zapazyčanaść Biełarusi za pastaŭlenuju ź Ihnalinskaj AES elektraenierhiju.
Doŭh u pamiery 50 młn abyšoŭsia Klemantoviču ŭ 30 młn dalaraŭ. U Biełarusi «El Pietroleum» atrymała prava praviadzieńnia na hetuju sumu enerhazalikaŭ. U pryvatnaści, u ich miežach jana pieratvaryłasia ŭ ekskluziŭnaha pastaŭščyka na rasijski rynak mietałakordu Biełaruskaha mietałurhičnaha zavoda.
Ale ŭ 2002 hodzie ŭdzieł «El Pietroleum» u pastaŭkach mietałapradukcyi pryvioŭ da bujnoha skandału — adstaŭki tahačasnaha dyrektara BMZ Vadzima Filipava i časovaha zatrymańnia samaha Klemantoviča.
Jamu ŭdałosia pakinuć Biełaruś, ale z taho času jon spyniŭ aktyŭnuju dziejnaść na biełaruskim rynku i zasiarodziŭsia spačatku na biznesie ŭ Rasii i Kazachstanie, a paśla pieranios centr apieracyj u niepryznanuju respubliku Abchaziju.
Biznesoviec byŭ žanaty z adnoj ź finalistak pieršaha konkursu pryhažości ŭ Biełarusi — «Minskaja pryhažunia — 1988», paźniej ŭładalnicy tytuła «Misis Maskva — 2000» biełaruscy Natalli Siańkievič.