Łukašenkaŭcy zahavaryli pra novy refierendum
Havorka pakul pra farmalnaść: źmienaŭ u asnoŭny zakon vymahaje zadumanaja reforma sistemy sudoŭ.
Fota BiełTA.
U pryvatnaści, Administracyja prezidenta maje namier skasavać Viarchoŭny haspadarčy sud i złučyć jahonyja funkcyi z funkcyjami Viarchoŭnaha suda. U toj ža čas abłasnyja haspadarčyja sudy zachavajucca, ale buduć pierajmienavany ŭ ekanamičnyja sudy.
Pavodle słovaŭ namieśnika kiraŭnika Administracyi prezidenta, adkaznaha za zakanatvorčaść, Valeryja Mickieviča, prapanovy abmierkavany z usimi zacikaŭlenymi strukturami, padrychtavany prajekty troch zakanadaŭčych aktaŭ: dekreta i dvuch ukazaŭ.
Na dumku Mickieviča, reforma daść mahčymaść unifikavać sudovuju praktyku, zabiaśpiečyć adnastajnaje tłumačeńnie i prymianieńnie ŭsimi sudami normaŭ materyjalnaha prava.
U Viarchoŭnym sudzie prapanujecca ŭstvaryć sudovuju kalehiju pa ekanamičnych spravach, jakuju ŭznačalić namieśnik staršyni Viarchoŭnaha suda. A kvalifikacyjnyja kalehii sudździaŭ abjadnajuć u sabie paŭnamoctvy dziejnych siońnia asobnych kvalifikacyjnych kalehij ahulnych i haspadarčych sudoŭ.
Novaja sistema budzie dapasavana da pabudovy sudovych sistem Rasii i Kazachstana.
Valeryj Mickievič padkreśliŭ, što abjadnańnie ahulnych i haspadarčych sudoŭ u adzinuju sistemu sudoŭ ahulnaj jurysdykcyi mahčyma biez papiaredniaj karekciroŭki Kanstytucyi, ale z dalejšym jaje źmianieńniem u častcy vyklučeńnia ŭpaminańnia ab Vyšejšym haspadarčym sudzie.
Pry hetym raździeł asnoŭnaha zakona, u jakim znachodzicca šerah artykułaŭ, što padlahajuć karekciroŭcy, moža być źmienieny tolki šlacham refierendumu, cytuje jaho aficyjnaje ahienctva BiełTA.
Admietna, što miarkujecca spačatku źmianić Kanstytucyi, a paśla spytać dazvołu na heta ŭ nasielnictva.