Miadźviedzieŭ: Abo realnaje abjadnańnie MAZa i KAMAZa, abo zakryvajem temu
mirtransporta.ru
Rasii i Biełarusi treba abo pierajści da realnaha abjadnańnia MAZa i KAMAZa, abo zakryć hetuju temu, zajaviŭ premjer-ministr RF Dźmitryj Miadźviedzieŭ 20 listapada ŭ Sankt-Pieciarburhu na pres-kanfierencyi pavodle vynikaŭ pasiadžeńnia kiraŭnikoŭ uradaŭ krain SND.
Adkazvajučy na pytańnie ab pierśpiektyvach ahulnaj vytvorčaści, Miadźviedzieŭ zaŭvažyŭ, što hetaje pytańnie jon staviŭ pierad premjer-ministram Biełarusi Michaiłam Miaśnikovičam, paviedamlaje BiełaPAN.
«Damoŭlenaści pakul niama, a heta było b karysna dla našych krain i pradpryjemstvaŭ. Napeŭna, jość jurydyčnyja ciažkaści, roźnicy ŭ padychodach. Ale daŭno čas hetuju dyskusiju zaviaršyć i pierajści da realnaha abjadnańnia abo zakryć hetuju temu», — cytuje Miadźviedzieva RIA Novosti.
«Damovilisia praciahnuć kanstruktyŭnuju pracu i pasprabavać adkazać na hetyja pytańni samym najbližejšym časam, kali heta nie ŭdasca, budzie škada», — dadaŭ Miadźviedzieŭ.
U svaju čarhu premjer-ministr Biełarusi Michaił Miaśnikovič zajaviŭ žurnalistam, što rašeńni pa sistemie kiravańnia chołdynham MAZa i KAMAZa buduć pryniatyja ŭ śniežni 2013 hoda.
«My miarkujem, i ź Dźmitryjem Anatolevičam (Miadźviedzievym) znajšli razumieńnie, što ŭ śniežni hetaha hoda budzie pryniata rašeńnie pa sistemie kiravańnia.
Heta było samaje vialikaje pytańnie. Ciapier adpracavany dahavor, pracujuć mižnarodnyja ekśpierty pa sistemie kiravańnia hetym chołdynham, bo tam płanujecca skancentravać kapitał 50 na 50. Ja dumaju, što hety prajekt budzie realizavany», — skazaŭ Miaśnikovič.
Nahadajem, 21 kastryčnika na sustrečy z kiraŭnikami niekatorych ŚMI krain SND Alaksandr Łukašenka zajaviŭ, što Biełaruś pakul nie bačyć pryvabnych prapanoŭ pa abjadnańni MAZa i KAMAZa ad rasijskaha boku.
«Kali abjadnajeciesia, što vy pryŭniesiacie ŭ nas? Jakija hrošy ŭ nas? Nijakich. Technałahičnych navinak — niama. KAMAZ siońnia prajhraje MAZu. Jakija novyja rynki atrymajem? Nijakich», — skazaŭ Łukašenka.
«Ja prapanavaŭ KAMAZu nie śpiašacca, bo ŭ nas jość drenny prykład pracy «Urałkalija», — zajaviŭ jon. Pavodle słoŭ biełaruskaha kiraŭnika, jon prapanavaŭ na praciahu troch hadoŭ pieradać akcyi KAMAZa i MAZa ŭ sumiesnuju kampaniju i kiravać joju.
«Čytaju na stužcy, napeŭna, ukidvańnie niejkaj infarmacyi, što nam nie cikavy prajekt biez akcyj. Nu, nie cikavy — pacierpim», — skazaŭ Łukašenka.
KAMAZ i MAZ z 2010 hoda viaduć pieramovy pra abjadnańnie. Spačatku abmiarkoŭvaŭsia abmien akcyjami pradpryjemstvaŭ, ale jon nie zadavalniaŭ biełaruskija ŭłady. Ciapier abmiarkoŭvajecca varyjant stvareńnia sumiesnaha chołdynha «Raśbiełaŭta» na bazie MAZa i KAMAZa.
Raniej hiendyrektar KAMAZa Siarhiej Kahohin zajaviŭ, što ŭ śviatle situacyi z «Urałkalijem» pakul nie płanuje jechać u Biełaruś na pieramovy pa abjadnańni.