5 śniežnia elektryčki na Maładziečna i «dyzieli» na Połack, Hudahaj, Lidu pojduć pa niazvykłym raskładzie albo zusim nie pojduć
Infarmacyja pra surjoznyja źmieny na adzin dzień u ruchu elektryčak i dyziel-ciahnikoŭ na ŭčastku Minsk - Maładziečna raźmiaščajecca na sajcie Biełaruskaj čyhunki.
Ramont čyhunačnaha mosta na pierahonie Uša - Maładziečna 5 śniežnia, u paniadziełak, zrobić niemahčymym skrazny ruch ad stancyi Minsk-Pasažyrski da stancyi Maładziečna i nazad. Pasažyraŭ ad stancyj Alachnovičy i Uša buduć padvozić na aŭtobusach.
Padrabiazny raskład «stykovak» elektryčak i aŭtobusaŭ u hety dzień BČ pryvodzić u tablicy.
Pry pierasadcy na pieraličanyja śpiecyjalnyja rejsy aŭtobusaŭ prajechać možna budzie pa svaim čyhunačnym kvitku.
Paviedamlajecca taksama pra toje, što niekatoryja ciahniki daviadziecca ŭvohule admianić abo puścić pa źmienienym raskładzie — tak adbudziecca z «dyzielami» na Hudahaj, Połack i navat Lidu.
Biełaruskaja čyhunka raić pasažyram, jakija źbiralisia 5 śniežnia jeździć pa ŭkazanych maršrutach na elektryčkach, skarystacca inšymi vidami transpartu. I tolki ŭ vypadku krajniaj nieabchodnaści jechać čyhunkaj, razumiejučy pry hetym, što čas u darozie moža pavialičycca.
Chočacca adznačyć, što tablica sa źmienami Biełaruskaj čyhunkaj zroblenaja całkam zručnaja. Infarmacyja ab admienie i pra źmieny ŭ ruchu ciahnikoŭ źviedzienaja ŭ ahulny dakumient, jaki možna pry žadańni razdrukavać.
Adnak znajści hetuju infarmacyju na sajcie čyhunki pakul što zmohuć tolki samyja daśviedčanyja.
Navina vykładzienaja tolki na sajcie Minskaha adździaleńnia čyhunki, pry hetym z hałoŭnaj staronki sajta BČ tudy trapić možna tolki mudrahielistymi šlachami. Na pieršaj staroncy asnoŭnaha sajta BČ niama ni namioku na toje, što ŭ adnym z kirunkaŭ 5 śniežnia ludziam varta skarystacca inšymi vidami transpartu. Toj, chto šukaje pa servisie z raskładami elektryčku ź Minska ŭ Maładziečna na hety dzień, moža surjozna ździvicca, što servis vydaje na 5 śniežnia tolki adzin sastaŭ, jaki pojdzie ŭ hety dzień «naskroź».