Sieviaryniec, Michalevič i Kuźniacoŭ ładziać 3 listapada antykamunistyčny forum
Jon budzie adkazam na inicyjatyvu Kamunistyčnaj partyi Biełarusi i Kamunistyčnaj partyi Rasii ab praviadzieńni ŭ Miensku 3 — 5 listapada mižnarodnaj sustrečy kamunistyčnych i pracoŭnych partyj.
Antykamunistyčny forum u procivahu kamunistyčnamu majuć namier pravieści 3 listapada ŭ Minsku pradstaŭniki pravaha kryła biełaruskaj apazicyi. Jakuju metu maje hetaje mierapryjemstva?
Forum «U budučyniu — biez kamunizmu» sustaršynia arhkamiteta partyi «Biełaruskaja chryścijanskaja demakratyja» Pavieł Sieviaryniec, namieśnik staršyni Partyi BNF Aleś Michalevič i viadomy historyk, daśledčyk stalinskich represij u Biełarusi Ihar Kuźniacoŭ vyrašyli pravieści ŭ adkaz na inicyjatyvu Kamunistyčnaj partyi Biełarusi i Kamunistyčnaj partyi Rasii ab praviadzieńni ŭ Miensku 3 — 5 listapada mižnarodnaj sustrečy kamunistyčnych i pracoŭnych partyj.
Takija sustrečy kampartyj prachodziać štohod. Papiaredni forum prajšoŭ u Lisabonie i sabraŭ kala 70 delehacyj. Adnak u biełaruskaj stalicy jon abiacaje prajści z admysłovym razmacham, bo adbudziecca napiaredadni 90‑hodździa prychodu da ŭłady ŭ Rasii partyi Lenina.
Levaja rytoryka — levaja palityka?
7 listapada ŭ Biełarusi źjaŭlajecca ahulnarespublikanskim śviatam «Dzień Kastryčnickaj revalucyi» i niepracoŭnym dniom. Status śviata farmalna nižej za dziaržaŭnaje, ale śviatkavańnie jubileju revalucyi całkam moža być skarystana kirujučym režymam dla prapahandy «biełaruskaha šlachu» i prezidenta asabista.
Va ŭsiakim razie, hetkaj viersii prytrymvałasia kiraŭnictva apazicyjnaj Partyi kamunistaŭ Biełaruskaj, čyja dziejnaść rašeńniem Viarchoŭnaha sudu ad 2 žniŭnia prypynienaja na paŭhady. Napiaredadni PKB rassyłała infarmacyjnyja listy partniorskim jeŭrapiejskim partyjam, u jakich śćviardžała, što kirujučy režym u Biełarusi tolki vykarystaje levuju rytoryku, ale pravodzić nialevuju palityku.
«Nie» kamunistyčnaj ekspansii
Arhanizatary foruma «U budučyniu — biez kamunizmu» majuć inšyja pretenzii. U intervju «Niamieckaj chvali» čalec arhkamitetu antykamunistyčnaha forumu Aleś Michalevič zaznačyŭ :
«Mianie aburyła toje, što ŭ Biełarusi zapłanavana praviadzieńnie tak zvanaj mižnarodnaj sustrečy kamunistyčnych i pracoŭnych partyj, tamu što Biełaruś źjaŭlajecca adnoj z tych krainaŭ, jakaja najbolš paciarpieła ad kamunizmu. My vyrašyli pakazać, što Biełaruś — nie miesca dla praviadzieńnia padobnych mierapryjemstvaŭ».
Pavodle A. Michaleviča, raz takaja mižnarodnaja sustreča rychtujecca ŭ Biełarusi, značyć, niechta dumaje, što da hetaha času kamunistyčnyja idei karystajucca tut papularnaściu. Ale, jak śćviardžaje namieśnik staršyni Partyi BNF, nasamreč, siarod moładzi tych, chto padzialaje kamunistyčnuju ideałohiju, praktyčna niama. Takim čynam, zadača antykamunistyčnaha foruma, jak jaje dekłarujuć arhanizatary, — pakazać, što Biełaruś nie budzie farpostam kamunistyčnaj ekspansii ŭ Jeŭropie.
«Naš narod jak častka jeŭrapiejskaj cyvilizacyi i jak nacyja, paciarpiełaja ad jarma kamunistyčnaj ułady, nie moža źmirycca z raspaŭsiudžvańniem antyhumannaj ideałohii», — śćviardžajuć arhanizatary foruma.