Haveła «kulturna» pavinšavali
5 kastryčnika ŭ radyjovypusku «Ranišni eskiz» kanała «Kultura» viadučaja ŭzhadała pra dzień narodzinaŭ Vacłava Haveła i dadała, što «ciapier jon (Haveł) padpisvaje zajavy, składzienyja prafesijnymi antysavietčykami i rusafobami».
Vacłaŭ Havał |
Nacyjanalnaja Dziaržaŭnaja Teleradyjokampanija nie zabyłasia na toje, što ŭ viadomaha palityka, dramaturha, piśmieńnika, byłoha prezidenta Čechii Vacłava Haveła 5 kastryčnika byŭ dzień narodzinaŭ.
5 kastryčnika ŭ radyjovypusku «Ranišni eskiz» kanała «Kultura» u rubrycy «Kalandar» viadučaja ŭzhadała pra dzień narodzinaŭ Vacłava Haveła. Paśla ŭzhadki pra jahonyja dasiahnieńni ŭ palityčnaj i kulturnickaj śfiery prahučała litaralna nastupnaja infarmacyja pra siońniašniuju dziejnaść byłoha prezidenta Čechii: «ciapier jon (Haveł) padpisvaje zajavy, składzienyja prafesijnymi antysavietčykami i rusafobami».
Viadučaja kanała «Kultura» Volha Halpiarovič, jakaja vychodziła ŭ eter rankam padćvierdziła, što sapraŭdy ahučyła taki tekst:
— Tak, sapraŭdy, ja kazała hetyja słovy ŭ efiry. Heta nie impravizacyja. Jany pračytany ź lista. Ja heta nie sama prydumała, pry padrychtoŭcy materyjału była vykarystana infarmacyja ź internetu, — pryznałasia Volha.
Byłomu kiraŭniku Biełteleradyjokampanii, u minułym pradstaŭniku Biełarusi pry AAN, paetu Hienadziu Buraŭkinu navat składana ŭjavić, što takoje mahło prahučać na kanale «Kultura»:
— Vacłaŭ Haveł — heta postać suśvietnaj viadomaści i suśvietnaj pavahi. Jon adyhraŭ značnuju stanoŭčuju rolu ŭ suśvietnaj historyi. Haveł taksama aŭtar šmatlikich litaraturnych tvoraŭ i pjes. Heta vielmi dobry, intelihientny i maralny čałaviek, jakoha možna śmieła nazyvać sumleńniem češskaj nacyi. Jon vydatna razumieje i pavažaje nie tolki kulturu svajho narodu, ale i inšych krain. Takoj pavahi da rasiejskaj kultury i jaje viedańnia, jak u Vacłava Haveła treba jašče pašukać. Možna nie padzialać jahonych palityčnych pohladaŭ, ale jaho nielha nie pavažać, źnievažać. U tych, chto tak robić niama nie tolki kultury, ale i rozumu, — ličyć spadar Hienadź.
— Ja b chacieŭ, ad imia biełarusaŭ, paprasić prabačeńnia za takija słovy, i ad siabie zyču jamu najpierš vialikaha zdaroŭja. Chaj jon viedaje, što sapraŭdnyja biełarusy jaho hłyboka pavažajuć, — dadaje Hienadź Buraŭkin.