Tak vyhladajuć čempijonki
U nacyjanalnym aeraporcie «Miensk» sustrakali nacyjanalnuju zbornuju Biełarusi pa baskietbole. Dziaŭčaty viarnulisia z čempijanatu Eŭropy pa baskietbole z bronzavymi medalami. Fotarepartaž Andreja Lankieviča.
U aeraport pryjechała bolš za sto čałaviek. Bolšaść składali žurnalisty i baćki medalistak, a taksama maładoje pakaleńnie baskietbalistak. Jany praz paru hadoŭ užo hatovyja zaniać miescy ŭ zbornaj siońniašnich tryjumfatarak. Samalot z Rymu prylacieŭ a 15:20, ale ŭbačyć baskietbalistak žadajučyja zmahli amal praz paŭtary hadziny. Niesvoječasova pryjšoŭ bahaž zbornic.
Jak tolki baskietbalistki źjavilisia ŭ faje aeraportu ich abstupili z usich bakoŭ — daryli kvietki i baloniki, całavalisia, prasili aŭtohraf ci interviju. Što praŭda, čynoŭniki ź Minsportu nia nadta dali dziaŭčatam paradavacca pieramozie razam z zaŭziatarami. Jany taropka adpraŭlali ŭsich baskietbalistak u aŭtobus, bo ŭžo a 17-j byŭ zaplanavany pryjom kamandy ŭ ministra sportu Alaksandra Hryharava. Darečy, sam ministar u aeraport tak i nie pryjechaŭ, adpraviŭšy zamiest siabie pieršaha namieśnika Dźmitryja Šyčka.
Našy dziaŭčaty kazali, što ŭ samym pačatku čempijanatu nia vielmi vieryli ŭ toje, što zmohuć pryjechać z Apeninaŭ z medalami, ale ŭpeŭnienaść pryjšła ciaham turniru. Niekatoryja navat trochu zasmucilisia , što nie atrymałasia prabicca ŭ finał. Jak pryznavałasia Alena Leŭčanka, najbolš składanym dla zbornaj staŭ čverćfinał z češkami. Paŭfinał i matč za «bronzu» pavodle jejnaha pryznańnia prajšli lahčej. Ciapier usie plany kamandy nacelenyja na toje, kab prabicca na Alimpijadu ŭ Pekin.
Amal adrazu pa vychadzie žurnalisty abstupili Kaciarynu Snycinu, jakaja paabiacała, što ŭ vypadku, kali zbornaja voźmie na čempijanacie medali, to Nastaśsia Vieramiejenka abstryže joj vałasy. Žurnalisty sustreli Snycinu ŭžo z novaj fryzuraj. Jana pryznałasia, što stryžka adbyłasia amal adrazu paśla zavajavańnia «bronzy», jašče ŭ haścinicy ŭ Artenie. Snycina skazała, što ŭžo bližejšymi dniami pojdzie ŭ cyrulniu znoŭ. Ale sa śmiecham dadała: «Vy tolki Naści Vieramiejenki ničoha nie kažycie, bo pakryŭdzicca, što jana drenny cyrulnik».
Hałoŭny trener zbornaj Anatol Bujalski byŭ vielmi niešmatsłoŭny:
«My ščaślivyja! Dziaŭčaty zrabili sapraŭdny podźvih. Maleńki, ale ŭsio ž podźvih. Nie pamylusia, kali skažu, chto nichto ŭ Eŭropie ŭsurjoz nie ŭsprymaŭ našy namiery i ambicyi. Adnak my krok za krokam vykonvali pastaŭlenyja pierad nami zadačy. My zavajavali medali, mahčyma, i niečakana, ale całkam zasłužana. Čempijanat nahadvaŭ niejkaje pole bitvy. Zdarovych vielmi mała, ale dziaŭčaty vytrymali da kanca».
«Dziela hetych medaloŭ dziaŭčaty zrabili ŭsio mahčymaje i niemahčymaje. Jašče niekalki hadzinaŭ tamu ja kupaŭsia ŭ italjanskim mory, tamu mnie ciažka adnaznačna acanić usio zroblenaje. Ja rady za našych baskietbalistak, za Radzimu. Rady za toje, što našy słovy nie razyšlisia ź dziejańniem», — skazaŭ A.Bujalski.
Natalla Marčanka ŭvajšła ŭ symbaličnuju zbornuju Eŭropy |
Maryna Kres |
Padstryžanaja Naściaj Vieramiejenkaj Kaciaryna Snycina |
Suaŭtar podźvihu biełaruskich dziaŭčat - hałoŭny trenier Anatol Bujalski |