MTS mirycca

Aleś Razanaŭ i Viktar Markaviec trymajucca svajho.

Na sudovym pasiedžańni pradstaŭnik kampanii MTS Dźmitry Chodas paviedamiŭ pra toje, što jahony bok razhladaje varyjant mirnaha vyrašeńnia sprečki z aŭtarami «jajkakvadrataŭ».

Adnak advakatka Viktara Markaŭca i Alesia Razanava Nadzieja Budnik ličyć, što raspaŭsiudžanaja niekatorymi ŚMI infarmacyja pra mahčymaje zamireńnie nie adpaviadaje rečaisnaści. Pavodle jaje infarmacyi pytańnie pra mahčymaść kampramisnaha vyrašeńnia sprečki ŭźnimajecca adkazčykam ad žniŭnia minułaha hodu. «Havorka pra zamireńnie nia maje nijakaj kankretyki, jana vielmi abstraktnaja, i heta pry tym, što kampanija mieła hetulki času, kab štości sapraŭdy vyrašyć», — patłumačyła spn. Budnik.

Čarhovaje sudovaje pasiedžańnie adbudziecca 10 kastryčnika a 14‑j hadzinie.

Nahadajem, što paet Aleś Razanaŭ i mastak Viktar Markaviec nastojvajuć na tym, što aperatar mabilnaj suviazi STAA «Mabilnyja TeleSistemy» vykarystaŭ u jakaści brendu kampanii stvorany imi supolna hrafičny vobraz — «jajkakvadrat». Paet i mastak nia majuć da kampanii materyjalnych pretenzijaŭ i patrabujuć pryznać fakt vykarystańnia stvoranaha imi supolna ŭ 1992 h. hrafičnaha vobrazu. Novy brend kampanii MTS źjaviŭsia ŭ traŭni 2006 h. Raspracavała jaho brytanskaja brendynhavaja ahiencyja Wolff Olins.

Sustrečy bakoŭ, što papiaredničali sudovamu pracesu, nie prynieśli plonu — pradstaŭnik MTS admaŭlaŭsia ad miravoj. Pazoŭ Markaŭca i Razanava trapiŭ na razhlad u sudovuju kalehiju pa spravach intelektualnaj ułasnaści Viarchoŭnaha sudu.

Siamion Piečanko

Kamientary da artykuła